Yeni Azərbaycan Partiyası nümayəndə heyətinin qardaş Türkiyəyə səfəri davam edir.

Dünən Ankarada YAP Sədrinin müa­vini – Mərkəzi Aparatın rəhbəri Tahir Budaqov ilə Türkiyə Böyük Millət Məcli­sinin sədri, İstanbul millət vəkili Numan Kurtulmuş arasında görüş keçirilib.

Numan Kurtulmuş Azərbaycan–Tür­kiyə münasibətlərinin bənzərsiz dostluq və qardaşlıq örnəyi kimi istər ikitərəfli münasibətlərin inkişafı, istərsə də regi­onal əməkdaşlıq və təhlükəsizlik kon­tekstində xüsusi əhəmiyyət daşıdığını diqqətə çatdırıb. Parlament sədri Azər­baycan ilə Türkiyənin bir-birinin milli maraqları və dövlətçilik mənafelərini beynəlxalq arenada layiqincə müdafiə etdiklərini vurğulayıb. TBMM-in sədri iki ölkə arasında parlamentlərarası əmək­daşlığın önəmindən də söz açıb. 

Tahir Budaqov Azərbaycan ilə Tür­kiyənin “Bir millət, iki dövlət” şüarı əsasında ortaq dəyərlərə, milli maraq­lara və ümumi hədəflərə uyğun uğurla fəaliyyət göstərərək strateji müttəfiq­lik münasibətlərini dərinləşdirdiklərini diqqətə çatdırıb. O qeyd edib ki, bu gün Türkiyə–Azərbaycan münasibətləri ilk növbədə hər iki ölkənin liderləri – cə­nab İlham Əliyevlə cənab Rəcəb Tayyib Ərdoğanın iradəsi və səyləri sayəsində inkişaf edir.

YAP Sədrinin müavini 44 günlük Vətən müharibəsinin Azərbaycan ilə Türkiyə arasındakı qardaşlıq münasi­bətlərinin sarsılmazlığını bir daha sübut etdiyini xüsusi olaraq diqqətə çatdırıb. O, Qarabağda lokal antiterror tədbir­ləri həyata keçirərək suverenliyini tam bərpa edən ölkəmizin haqlı və ədalətli mövqeyinin qardaş Türkiyə tərəfindən qətiyyətlə müdafiə olunmasının böyük mənəvi-siyasi önəm daşıdığını bildirib. 

***

Həmin gün Tahir Budaqov AK Par­ti Sədrinin birinci müavini, Bursa mil­lət vəkili Efkan Ala, partiyanın xarici əlaqələr üzrə müavini, İstanbul millət vəkili Zafer Sırakaya və Türkiyə Prezi­dentinin köməkçisi Cevdet Yılmazla da görüşüb. 

Qeyd edək ki, nümayəndə heyəti­nin tərkibinə Milli Məclisin deputatla­rı – YAP İdarə Heyətinin üzvü Pərvin Kərimzadə, YAP Təftiş Komissiyası­nın sədri Sevinc Hüseynova, YAP ilə AK Parti arasında əlaqələndirici Ramil Həsən və YAP Mərkəzi Aparatının İn­formasiya texnologiyaları və ictimaiy­yətlə əlaqələr şöbəsinin müdiri Nurlan Qələndərov daxildir.