Azərbaycan xalqına ağır itki üz verib. Dünən görkəmli neftçi-geoloq, Azərbaycan Dövlət Neft Şirkətinin bi­rinci vitse-prezidenti, akademik Xoş­bəxt Bağı oğlu Yusifzadə ömrünün 94-cü ilində dünyasını dəyişib.

Xoşbəxt Yusifzadə 1930-cu il yan­varın 14-də Bakının Pirşağı kəndində anadan olub. 1947-ci ildə orta məktəbi bitirmiş, 1952-ci ildə Azərbaycan Sə­naye İnstitutunda ali təhsili neftçi-geo­loq ixtisası ilə baş vurmuş soydaşımız 70 ilə yaxın müddətdə ölkəmizdə neft və qaz hasilatının təşkili və tərəqqisi sahəsində misilsiz xidmətlər göstərib. İstedadlı və yurdsevər neft mütəxəssisi kimi Xoşbəxt Yusifzadənin irimiqyaslı, çoxcəhətli elmi-praktik və rəhbər fəa­liyyəti sovet dövründə və müstəqillik illərində milli neft sənayemizin parlaq səhifələrini təşkil edir. Onun rəhbərliyi və bilavasitə iştirakı ilə dəniz neft-qaz yataqlarının işlənilməsinin nəzəri əsas­ları hazırlanıb və uğurla həyata keçiri­lib.

Dünya şöhrətli neftçi-geoloqun Vətən qarşısında xidmətləri yüksək qiymətləndirilib. O, “Şöhrət”, “Şərəf”, I dərəcəli “Əmək”, “İstiqlal” “Heydər Əliyev” ordenlərinə, bir sıra digər təl­tiflərə layiq görülüb. Fədakar əməyi, Vətən sevgisi və yorulmaz fəaliyyəti xalqımızın görkəmli oğluna böyük nü­fuz və şöhrət qazandırıb.

Allah rəhmət eləsin!