Xarici İşlər naziri Ceyhun Bayramov İsveçrə Konfederasiyasına işgüzar səfəri çərçivəsində sentyabrın 12-də BMT-nin Cenevrədəki ofisinin baş direktoru Tatyana Valovaya ilə görüşüb.

Görüş zamanı Azərbaycan ilə UNOG arasında əməkdaşlıqdan məmnunluq ifa­də olunaraq UNOG-nin insan hüquqları, gənclər, gender bərabərliyi, dayanıqlı in­kişaf məqsədləri, ətraf mühitin mühafizə­si, iqtisadi inkişaf kimi istiqamətlər üzrə fəaliyyətlərinə dəstək ifadə edilib.

Azərbaycanın, öz növbəsində, BMT çərçivəsində aktiv fəaliyyət göstərdiyi, 2023-cü ildə BMT-nin Mərkəzi Asiya İq­tisadiyyatları üzrə Xüsusi Proqramına (SPECA) sədrlik etdiyi və cari ilin noyabr ayında Bakıda SPECA-nın sammitinin baş tutacağı diqqətə çatdırılıb.

Xanım Valovayanın 2022-ci ildən eti­barən Azərbaycana baş tutmuş səfərləri və bu səfərlər çərçivəsində keçirilmiş ali və yüksək səviyyəli görüşlər məmnunluq­la xatırlanıb və Azərbaycanın Cenevrə­dəki Daimi Nümayəndəliyi, habelə ölkə­mizin digər qurumları ilə UNOG arasında əməkdaşlığın gücləndirilməsi üçün ya­ratdığı şəraitə görə UNOG-nin rəhbərinə minnətdarlıq bildirilib.

Görüş zamanı bölgədəki vəziyyət, Azərbaycan–Ermənistan normallaşma prosesi barədə qarşı tərəfə məlumat ve­rilib.

* * *

Həmin gün Xarici İşlər naziri Ceyhun Bayramov BMT-nin Avropa üzrə İqtisadi Komissiyasının icraçı katibi Tatyana Mol­çean ilə də görüşüb.

Azərbaycanın postpandemiya və postmünaqişə dövründə keyfiyyətcə yeni olan və 2022‒2030-cu illəri əhatə edən strateji inkişaf mərhələsinə daxil olduğunu qeyd edən nazir Ceyhun Bay­ramov 2030-cu ilədək Azərbaycanın Mil­li İnkişaf Prioritetləri barədə məlumat ve­rib. O, ölkəmizin işğaldan azad edilmiş ərazilərində 2050-ci ilə qədər “xalis sıfır emissiya” zonasının elan edilməsi, “ya­şıl enerji zonası”nın yaradılması, bərpa olunan enerji mənbələrindən istifadə, “Ağıllı şəhər” və “Ağıllı kənd” konsep­siyasının yaradılması, transsərhəd su ehtiyatlarının davamlı idarə olunması və yaşıllıqların artırılması kimi bərpa və re­abilitasiya layihələri və planları haqqın­da danışıb.

Ermənistan tərəfindən törədilmiş eko­loji terror, işğal nəticəsində dağıntılar, bölgədə geniş mina təhdidləri, eləcə də işğalın fəsadlarının aradan qaldırılması səyləri qarşı tərəfin diqqətinə çatdırılıb. 

* * * 

Xarici İşlər naziri Ceyhun Bayramov sentyabrın 12-də Beynəlxalq Qırmızı Xaç Komitəsinin prezidenti Miryana Spolyariç Eqqer ilə görüşüb.

Görüş zamanı regiondakı son və­ziyyət fonunda Azərbaycan ilə BQXK arasında əməkdaşlığın hazırkı durumu, mövcud çağırışlar və gələcək perspektiv­lər barədə müzakirələr aparılıb.

Azərbaycan qanunvericiliyinə və mü­vafiq prosedurlara əməl etməklə BQXK vasitəsilə erməni sakinlərin ehtiyaclarının qarşılanması üçün Ağdam–Xankəndi və Laçın–Xankəndi yolundan paralel istifa­dənin zəruriliyi vurğulanıb. Əldə olunmuş razılıqlara baxmayaraq Ermənistanın və onun yaratdığı qondarma rejimin bu razı­lıqları kobud şəkildə pozduğu xatırlanıb. Hazırda Laçın yolundan gündəlik əsasda hər iki istiqamətdə erməni sakinlərin ke­çidinin təmin edildiyi halda Ermənistanın “blokada” iddialarının əsassız olduğu vurğulanıb. 

Ümumiyyətlə, Azərbaycan vasitəsilə əraziyə yüklərin daşınmasına maneçilik törədilməsinin siyasi manipulyasiya ol­duğu, Ermənistanın separatçılığı qızış­dırmaq cəhdlərinin tərkib hissəsi olduğu qeyd edilib.

XQ