Beynəlxalq Maliyyə Korporasiyası (IFC) respublikamızla birgə kənd təsərrüfatı sektorunda innovativ maliyyələşdirmə vasitələrinin tətbiqi üzərində çalışır.
IFC-nin Cənubi Qafqaz üzrə regional meneceri İvana Fernandes Duarte ölkə mediasına müsahibəsində bu barədə məlumat verib. O, Azərbaycanda aqrar sektorun qeyri-neft sektorunun inkişafına təşviq və ölkədə kənd təsərrüfatı sahələrində iş yerlərinə dəstək üçün yüksək potensiala malik olduğunu bildirib, həmçinin IFC-in hökumətlə birgə kənd təsərrüfatını möhkəmləndirə və kiçik fermerləri qlobal dəyər zəncirinə daxil edə biləcək innovativ maliyyələşdirmə vasitələrinin tətbiqinə üstünlük verildiyini diqqətə çatdırıb.
Duarte qeyd edib ki, çox vaxt kiçik fermerlər bankların tələb etdiyi daşınmaz əmlak girovuna sahib olmadıqlarından kredit almaqda çətinlik çəkirlər. “Bu halda məhsul qəbzləri səmərəli həll yolu ola bilər. Bu sahədə fermerlər gələcək məhsuldan girov qismində istifadə edə bilərlər. Aqrar qəbzlər rahat və etibarlı vasitə kimi fermerlərə yüksək keyfiyyətli toxum və gübrə, eləcə də digər resurslar əldə etmək üçün dövriyyə kapitalı əldə etməyə kömək edir. Həmçinin qısamüddətli kredit və ya zəmanət formasında maliyyə vəsaiti təmin etmək üçün anbar qəbzlərindən (mövsümsonrası maliyyələşdirmə) istifadə olunur”, – IFC-nin regional meneceri bildirib.
Duarte xatırladıb ki, IFC İsveçrə İqtisadi Məsələlər üzrə Dövlət Katibliyi (SECO) ilə birgə həyata keçirilən kənd təsərrüfatının maliyyələşdirilməsi layihəsi çərçivəsində yerli maliyyə müəssisələrini dəyər zəncirinin maliyyələşdirilməsi məhsullarının buraxılmasında dəstəkləməklə həm də dəyər zəncirlərini (çiyələk və fındıq) seçməyə və ixrac bazarlarında rəqabət qabiliyyətini artırmağa kömək edib.
Qeyd edək ki, Azərbaycan 1995-ci ildə IFC-yə üzv olub. IFC bank işi, korporativ idarəetmə, lizinq, kiçik və orta sahibkarlığın inkişafı, mənzil maliyyələşdirilməsi, dəyərli kağızlar bazarının inkişafı, investisiyaların təşviqi və işgüzar mühit sahəsində konsultativ layihələr həyata keçirib.
XQ