Ölkəmizdə səfərdə olan Slovakiya Respublikası Milli Şurasının Sədri Boris Kolların rəhbərlik etdiyi nümayəndə heyəti sentyabrın 6- da Füzuli Beynəlxalq Hava Limanına gedib.
Qarabağ iqtisadi rayonuna daxil olan işğaldan azad edilmiş ərazilərdə (Şuşa rayonu istisna olmaqla) Azərbaycan Respublikası Prezidentinin xüsusi nümayəndəsi Emin Hüseynov qonaqlara hava limanı haqqında məlumat verib. O, Qarabağın “hava qapısı” adlandırılan Füzuli Beynəlxalq Hava Limanının ən müasir səviyyədə inşa olunduğu diqqətə çatdırıb. Bildirib ki, hava limanının müasir infrastrukturla təchiz olunan terminalı saatda ən azı 200 sərnişinin buraxılışına imkan verir. E.Hüseynov, həmçinin Füzulidə görülən və görüləcək işlər barədə slovakiyalı qonaqlara məlumat verib.
Qeyd olunub ki, baş planda 2040-cı ilədək Füzuli şəhərinin inzibati ərazisinin 1943 hektara, əhalisinin 50 min nəfərə çatdırılması nəzərdə tutulur. Şəhərdə rahat və müasir həyat şəraitinin təmin edilməsi üçün orta və azmərtəbəli yaşayış binaları, həyətyanı torpaq sahələri olan fərdi evlər inşa ediləcək, təhsil, səhiyyə, mədəniyyət, istehsalat müəssisələri və digər təyinatlı zonalar yaradılacaq.
Sonra qonaqlar Füzuli şəhərində ermənlərin törətdikləri vəhşiliklərlə tanış olublar. Onlara ermənilərin 30 illik işğal dövründə ölkəmizə qarşı törətdikləri cinayətlər barədə ətraflı məlumat verilib. Bildirilib ki, ermənilər bütün evləri, sosial obyektləri dağıdıb, təsərrüfatları məhv ediblər. Həmçinin ərazilərin Ermənistan tərəfindən minalandırılması, bu istiqamətdə aparılan təmizləmə işləri barədə məlumat verilib.
***
Həmin gün slovakiyalı deputatlar Şuşaya səfər ediblər. Qonaqlara şəhər haqqında məlumatlar verilib. Bildirilib ki, qəhrəman əsgərlərimiz böyük şücaət göstərərək sıldırım qayalarla Cıdır düzünə qalxıb, canları-qanları bahasına Şuşanı işğaldan azad ediblər. Bu gün Cıdır düzü işğaldan əvvəl olduğu kimi, möhtəşəm tədbirlərin keçirildiyi məkana çevrilib.
Vətən müharibəsində əldə olunan möhtəşəm Zəfərdən sonra Prezident İlham Əliyev 2021-ci il 7 may tarixli Sərəncamı ilə Şuşa şəhərini ölkənin Mədəniyyət paytaxtı elan edib. Bu sərəncamla Vaqif Poeziya günləri və “Xarıbülbül” festivalı da bərpa olunub.
Ə.BƏDƏLOV
XQ