“Heydər Əliyev İli” çərçivəsində qədim Naxçıvanda “Diaspor Gənclərinin IV Yay Düşərgəsi”nin rəsmi açılış mərasimi keçirilib.
“Heydər Əliyev və diaspor quruculuğu” mövzusunda sənədli filmin nümayişindən sonra Azərbaycan Respublikası Prezidentinin Naxçıvan Muxtar Respublikasında xüsusi nümayəndəsi Fuad Nəcəfli düşərgə iştirakçılarını salamlayıb. Diasporla İş üzrə Dövlət Komitəsinin sədri Fuad Muradov, Milli Məclisi sədrinin birinci müavini Əli Hüseynli və Heydər Əliyev Fondunun nümayəndəsi Aydan Ramazanova düşərgənin işinə uğurlar arzulayıblar.
Tədbir bədii hissə ilə yekunlaşıb.
Avqustun 18-dək davam edəcək Diaspor Gənclərinin IV Yay Düşərgəsi Azərbaycan Respublikası Diasporla İş üzrə Dövlət Komitəsinin təşkilatçılığı ilə gerçəkləşdirilir. Düşərgənin tərəfdaşı Heydər Əliyev Fondudur, təşkilati dəstəyi Azərbaycan Respublikası Prezidentinin Naxçıvan Muxtar Respublikasındakı xüsusi nümayəndəliyinə göstərir.
Diaspor tarixinin möhtəşəm layihələrindən biri hesab olunan IV Yay Düşərgəsində 53 ölkəni təmsil edən 100-dən çox gənc iştirak edir. Onların arasında həm dünyanın müxtəlif ölkələrində yaşayan azərbaycanlılar, həm də Azərbaycana dost münasibəti bəsləyən xalqların nümayəndələri var. Layihənin Heydər Əliyevin bir əsr öncə dünyaya gəldiyi qədim Naxçıvan şəhərində keçirilməsi Ulu öndərin xatirəsinə dərin ehtiramı ifadə edir.
“Xalq qəzeti”
