Dünən Ədliyyə Nazirliyinin geniş kollegiya iclası keçirilib. Nazir Fikrət Məmmədov cıxış edərək məhkəmə-hüquq sistemində islahatların davam etdirildiyini bildirib, vətəndaşların ədliyyə və məhkəmə fəaliyyətinə əlçatanlığının asanlaşdırılmasına xidmət edən rəqəmsal innovasiyaların geniş tətbiqinə toxunub. 

Toplantıda ötən ay ölkə üzrə tam tətbiqi başa çatdırılmış “Elektron məh­kəmə” informasiya sistemi barədə vi­deoçarx nümayiş etdirilib. Sonra mə­lumat verilib ki, e-məhkəmə sistemi məhkəməyə müraciət anından qərarın icrasına qədər bütün prosesi əhatə edir.

İclasda ədliyyə fəaliyyətinin əsas is­tiqamətləri üzrə cari ilin birinci yarısın­da görülmüş işlər ətraflı təhlil olunaraq bildirilib ki, respublikamızda aparılan geniş qanunyaradıcı fəaliyyətdə fəal iştirak edən nazirlikdə ilin əvvəlindən 2 min 200-dən çox hüquqi akt layihəsi hazırlanıb və ya ekspertizadan keçiri­lib. Əhalinin hüquqi biliklərinin yüksəl­dilməsi məqsədilə milli qanunvericiliyin vahid elektron bazasına – e-qanun.az saytına daxilolmaların sayı ötən ilin eyni dövrü ilə müqayisədə, təxminən, 2 dəfə artaraq 2,4 milyona çatıb.

Dövlətimizin başçısının tapşırığına uyğun olaraq vətəndaşların, xüsusilə Vətən müharibəsi iştirakçılarının və şə­hid ailələrinin müraciətlərinə qayğı və həssaslıqla yanaşılaraq ötən dövrdə 7 min 700-ə yaxın vətəndaş nazirlikdə, bölgələrdə, habelə virtual qaydada qə­bul edilib, qaldırılan məsələlərlə bağlı zəruri tədbirlər görülüb.

Kollegiyada ölkə iqtisadiyyatının inkişafı və mülki dövriyyənin artması nəticəsində 2,5 milyona yaxın notariat hərəkətinin aparıldığı, 138 mindən çox vətəndaşlıq vəziyyəti aktının dövlət qeydiyyatına alındığı bildirilib, bu əmə­liyyatlar, ümumilikdə, 6,6 milyon manat vəsaitin, daşınmaz əmlakla əlaqədar müqavilələr üzrə isə ötən ilin müvafiq dövrü ilə müqayisədə 20 faiz çox – 29 milyon manata yaxın sadələşdirilmiş verginin dövlət büdcəsinə köçürüldüyü vurğulanıb. Cari ildə əhaliyə göstərilən elektron ədliyyə xidmətlərinin təkmil­ləşdirilməsi ilə bağlı əlavə tədbirlər gö­rülüb, vətəndaş məmnunluğu doğuran “Mobil notariat” tətbiqi istifadəçilərinin sayı 33 faiz çoxalaraq 600 minə çatıb.

İclasda nazirliyin fəaliyyət dairəsinə daxil olan digər sahələr üzrə əldə edil­miş uğurlardan da söhbət açılıb, qar­şıda duran vəzifələr geniş müzakirə olunb. Sonda müvafiq qərarlar qəbul edilib, məsul şəxslərə tapşırıqlar veri­lib. 

“Xalq qəzeti”