Rusiyanın Azərbaycanlı Gənclər Birliyinin (AMOR) fəxri sədri Leyla Əliyevanın təşəbbüsü ilə iyunun 22-24-də Tümen şəhərində AMOR-un Ural-Sibir Regionlararası Forumu keçirilib.
Birlikdən bildiriblər ki, AMOR-un yeddinci regionlararası forumu olan bu tədbirdə təşkilatın 12 nümayəndəliyi iştirak edib.
Tədbirin fəxri qonaqları Tümen vilayətinin Millətlərlə İş üzrə Komitəsinin şöbə müdiri Vildan Yakupov, İdman və Gənclər Siyasəti Departamentinin nümayəndəsi Marina Şestakova, Tümen Regional Dumasının deputatı Larisa Tsupikova olublar.
Forumda Ulu öndər Heydər Əliyevin anadan olmasının 100-cü ildönümü ilə əlaqədar Rusiya Federasiyasında AMOR tərəfindən keçirilən tədbirlər haqqında məlumat verilib. İştirakçılar arasında müzakirələr zamanı Rusiya Federasiyasında Azərbaycan gəncliyinin hərtərəfli inkişafına yönəlmiş və yaxın gələcəkdə həyata keçiriləcək layihələrin ümumi hədəflərindən, planlardan söz açılıb. Tədbirdə regional bölmələrin nümayəndələri könüllülük, ekologiya və sağlam həyat tərzi sahələrində planlaşdırılan layihələri müzakirə edib, cari və qarşıda duran tədbirlər haqqında məlumat və fikir mübadiləsi aparıblar.
Sonra regional bölmələrin inkişaf perspektivləri müzakirə olunub və qarşıda duran hədəflər müəyyən edilib.
Həmçinin iyunun 24-də forum çərçivəsində “Xalqlar Dostluğu” parkında təşkilatın ənənəvi ağacəkmə aksiyası baş tutub. Aksiyada AMOR-un nümayəndələri, Tümen Şəhər Administrasiyasının İdman və Gənclər Siyasəti Departamentinin müdiri və Tümen Şəhər Administrasiyasının Millətlərarası Əlaqələr Komitəsinin nümayəndəsi iştirak ediblər.
Forumun rəsmi hissəsinin sonunda iştirakçılar “Svoboda” teatrında görkəmli geoloq Fərman Salmanovun həyatından bəhs edən “İzlənilməz optimist” tamaşasına baxıblar.