Şərqi Azərbaycanın yeni salınmış Səhənd şəhərində bələdiyyə məmurları və Şəhər Şurasının üzvləri həbs edilib. Bu barədə Üskü şəhərinin Ümumi və İnqilab Prokurorluğu məlumat yayıb.
Məlumatda saxlanılanların kimliyi və sayı barədə açıqlama verilməyib. Lakin onların korrupsiya, mənimsəmə və vəzifə səlahiyyətlərindən sui-istifadədə ittiham olunduğu bildirilir. Həbs əməliyyatının Təhlükəsizlik və Kəşfiyyat Nazirliyinin (ETTELAAT) əməkdaşları tərəfindən keçirildiyi və Səhənd Şəhər Şurasının ofisinin bağlandığı qeyd edilib.
Xatırladaq ki, Beynəlxalq Şəffaflıq Təşkilatının fevralın əvvəlində yaydığı hesabatda İran ən çox korrupsiyyaya uğramış ölkələr arasındadır.
Hesabata görə, dünyanın 180 ölkəsi arasında korrupsiyaya görə İran 25 balla 147-ci yerdədir və dünyanın ən korrupsiyalaşmış ölkələrindən biri hesab olunur. İran ötən illə müqayisədə builki siyahıda üç pillə geriləyib. İran, hətta Uqanda, Mozambik, Madaqaskar, Liberiya, Kamerun, Pakistan və Qırğızıstan kimi ölkələrdən də aşağı düşüb.
Hüseyn RƏHİMZADƏ
