Mayın 16-da 6-cı çağırış Naxçıvan Muxtar Respublikası Ali Məclisinin 10-cu sessiyası keçirilib. Bu barədə qəzetimizə Muxtar Respublika Ali Məclisinin mətbuat xidmətindən bildirilib.

Naxçıvan Muxtar Respublikası Ali Məclisi sədrinin birinci müavini Azər Zeynalov sessiyanın gündəliyi barədə məlumat verib:

1. Naxçıvan Muxtar Respublikası­nın 2022-ci il büdcəsinin icrasının təs­diq edilməsi;

2. “Toxumçuluq haqqında” və “İnsan orqan və ya toxumalarının transplantasiyası haqqında” Naxçıvan Muxtar Respublikası qanunlarının ləğv edilməsi;

3. “Naxçıvan Muxtar Respublikası Ali Məclisi deputatının statusu haqqın­da” Naxçıvan Muxtar Respublikasının qanununda dəyişiklik edilməsi;

4. Naxçıvan Muxtar Respublikası Ali Məclisi sədrinin müavininin seçil­məsi№

5. Cari məsələ.

Gündəlikdə duran 1-ci məsələ ilə bağlı Naxçıvan Muxtar Respublikası maliyyə nazirinin müavini Həsən İs­mayılov çıxış edib. “Naxçıvan Muxtar Respublikasının 2022-ci il büdcəsinin icrası haqqında” Qanun səsə qoyula­raq qəbul olunub. Muxtar respublikanın 2022-ci il büdcəsinin icrası gəlirlər üzrə 197 milyon 968 min 88 manat, xərclər üzrə isə 605 milyon 869 min 766 manat məbləğində olmaqla, təsdiq edilib.

Gündəlikdə duran 2-ci məsələ – “Toxumçuluq haqqında” və “İnsan orqan və ya toxumalarının transplan­tasiyası haqqında” Naxçıvan Muxtar Respublikası qanunlarının ləğv edil­məsi ilə bağlı bildirilib ki, nəzərdə tu­tulan münasibətlər Azərbaycan Res­publikasının qanunları ilə tənzimlənir. Müzakirə olunan məsələ ilə əlaqədar qanun layihələri oxunub, “Toxumçuluq haqqında” və “İnsan orqan və ya toxu­malarının transplantasiyası haqqında” qanunlar ləğv edilib.

Sessiyanın gündəliyində duran 3-cü məsələnin müzakirəsi zama­nı qeyd olunub ki, dəyişikliyin əsas məqsədi deputatlara verilən vergilər­dən azad olunmuş pul təminatının ləğv edilməsidir. Azərbaycan Respublikası­nın müvafiq qanununda da dəyişiklik­lər edilərək bu pul təminatı ləğv olu­nub. Müzakirə olunan məsələ ilə bağlı “Naxçıvan Muxtar Respublikası Ali Məclisi deputatının statusu haqqında” Qanunda dəyişiklik edilməsi barədə” Naxçıvan Muxtar Respublikası qanunu qəbul edilib.

Sessiyada gündəlikdə duran 4-cü məsələnin müzakirəsi zamanı Naxçı­van Muxtar Respublikası Ali Məclisi sədrinin müavini vəzifəsinə 16 say­lı Qıvraq Seçki Dairəsindən seçilmiş deputat İbrahimov Anar Adil oğlunun namizədliyi irəli sürülüb. Müzakirədən sonra səsvermə keçirilib və Anar İbra­himov Naxçıvan Muxtar Respublikası Ali Məclisi sədrinin müavini seçilib.

Gündəlikdə duran 5-ci məsələ ilə bağlı sessiyada “Naxçıvan Muxtar Respublikası Ali Məclisi deputatları­nın əməkhaqlarının müəyyən edilməsi barədə” Naxçıvan Muxtar Respublika­sı Ali Məclisinin Qərarı səsə qoyularaq qəbul olunub.

Bununla da altıncı çağırış Naxçı­van Muxtar Respublikası Ali Məclisinin onuncu sessiyası öz işini başa çatdırıb.

“Xalq qəzeti”