Mayın 15-də Rusiya Federasiyasının paytaxtı Moskva şəhərində Heydər Əliyevin anadan olmasının 100 illiyi münasibətilə rəsmi qəbul təşkil edilib. 

AZƏRTAC xəbər verir ki, tədbirdə çıxış edən Milli Məclisin Sədri Sahibə Qafarova Moskvada Azərbaycanın ümummilli lideri Heydər Əliyevin 100 illiyinə həsr olunmuş belə tədbirlərin keçirilməsini dahi liderin xatirəsinə, xalqımıza səmimi hörmətin tə­zahürü kimi dəyərləndirib.

Moskvada təşkil olunan sərgilərin ulu öndərin bütün xalq və ölkə, eləcə də Azər­baycan-Rusiya münasibətlərinin inkişafı üçün gördüyü işlərin miqyasını bir daha nümayiş etdirdiyi vurğulanıb.

Ümummilli liderin bütün arzularının bu gün Azərbaycan Prezidenti İlham Əliyev tərəfindən ardıcıl surətdə həyata keçirildi­yi, Azərbaycanla Rusiya arasında münasi­bətlərin daha da inkişaf etdirildiyi diqqətə çatdırılıb. 

Qəbulda çıxış edən Dövlət Dumasının sədr müavini Aleksey Qordeyev, Azərbay­canın Rusiyadakı səfiri Polad Bülbüloğlu görkəmli dövlət xadimi Heydər Əliyevin hə­yatı və siyasi fəaliyyəti haqqında danışıb, onun Azərbaycan-Rusiya münasibətlərinin inkişafındakı xidmətlərini qeyd ediblər.

Sonra tədbir bədii proqramla davam etdirilib.

Rəsmi qəbulda Azərbaycan Res­publikası Prezidentinin köməkçisi Anar Ələkbərov, Moskvada akkreditə olunmuş səfirliklərin nümayəndələri, Rusiya Fede­rasiyası Federal Məclisinin Dövlət Duma­sının və Federasiya Şurasının deputatları, dövlət və hökumət nümayəndələri, Azər­baycanın və Rusiyanın mədəniyyət, in­cəsənət xadimləri, ictimaiyyətin nümayən­dələri iştirak ediblər.