Dünən Türkiyə vətəndaşlarını təxliyə etmək üçün Sudana uçan hərbi-nəqliyyat təyyarəsi eniş zamanı atəşə tutulub. Məlumatı Türkiyə Milli Müdafiə Nazirliyinə istinadən “Anadolu” agentliyi verib.
Müdafiə Nazirliyinin məlumatında bildirilir: “Münaqişələrin davam etdiyi Sudanda qalan vətəndaşlarımızın təxliyəsi üçün Vadi-Seyidna hərbi bazasına gedən C-130 tipli təyyarəmizə yüngül silahlarla atəş açılıb. Təyyarəmiz xəsarətsiz eniş edib. Heyət üzvləri arasında xəsarət alan olmayıb”.
“Al-Hadath” telekanalının yaydığı məlumata görə, Türkiyə təyyarəsinə Sudanın Çevik Reaksiya Qüvvələri (xüsusi təyinatlılar) atəş açıb və nəticədə heyət üzvlərindən biri yaralanıb. Çevik qüvvələr tərəfindən insidentlə bağlı şərh verilməyib.
Sudan Silahlı Qüvvələrinin Baş Qərargahı da Türkiyənin C-130 “Qerkules” təyyarəsinin Çevik Reaksiya Qüvvələri tərəfindən atəşə tutulduğunu təsdiqləyib. Bununla bağlı məlumatda deyilir: “Təxliyə üçün gəlmiş təyyarə aprelin 28-də Vadi-Seyidna aviabazasına enərkən atəşə tutulub. Nəticədə, təyyarənin yanacaq çəni zədələnib və heyət üzvlərindən bir nəfər yaralanıb”.
Məlumata görə, təyyarə səhər tezdən 07-25-də eniş enib. Dəymiş ziyan təcili olaraq aradan qaldırılıb. Baş Qərargah “qiyamçıları” təxliyə vaxtı təxribatlardan çəkinməyə çağırıb.
“Xalq qəzeti”