Ukrayna ordusu əks-hücuma hazırlaşır. Belə bir bəyanatla ölkənin müdafiə naziri Aleksey Reznikov çıxış edib və müttəfiq ölkələri Kiyevi hərbi cəhətdən dəstəkləməyə çağırıb. Məlumatı “Kommersant” yayıb.
Reznikov Avropa İttifaqının nümayəndələri ilə görüşdə tərəfdaşlara minnətdarlığını bildirib: “Ukrayna ordusu Qərbin silahları hesabına döyüş meydanında uğur qazanır. Ancaq biz əks-hücuma hazırlaşırıq və Ukraynaya ağır texnika və hazırlıqlı ehtiyat qüvvələr lazımdır”.
Dünən Macarıstanın Baş naziri Viktor Orban da bəyan edib ki, Avropa İttifaqı ölkələri Ukraynaya “sülhməramlı tipli qoşun” göndərmək məsələsini müzakirə etməyə yaxındır. Orbanın sözlərinə görə, əvvəllər bu cür müzakirələr olmayıb.
Bununla bağlı jurnalistlər RF Prezidentinin mətbuat katibi Dmitri Peskova sual veriblər. Peskov deyib: “Əgər artıq hansısa ciddi danışıqlar haqda söhbət gedirsə, bu, fövqəladə dərəcədə təhlükəli müzakirədir”.
P.BABAKƏRLİ, “Xalq qəzeti”