İkili İran–ABŞ vətəndaşlığı daşıyan Siyamək Namazi 2015-ci ildən Tehranda həbsdədir. O, bu ölkəyə səfər edərkən həbs olunub. Məhbus CNN-in əməkdaşı Kristian Amanpur ilə telefonla danışarkən Ağ Evin onun vəziyyətinin nə qədər ağır olduğunu qiymətləndirməməsindən dərin narahatlığını bildirib.
Namazi ABŞ Prezidenti Co Baydenə müraciətində “günahsız amerikalıların azadlığını siyasətdən üstün tutmağı” və onun azadlığa buraxılması üçün səyləri gücləndirməyi xahiş edib. Səsi arabir boğulan Namazi deyib ki, mənim bu riski nəzərə alıb CNN-ə dünyanın ən qəddar həbsxanalarından olan “Evin”dən əlaqə yaratmağım özü sizə vəziyyətimin nə qədər ağır olduğunun göstəricisidir.
51 yaşlı Namazi İranda həbsdə yatan ikili vətəndaşlığı olan 3 nəfərdən ən stajlısıdır. Digər iki məhbus isə iş adamı Emad Sharghi və 66 yaşlı ekoloq Morad Tahbazdır. Hər ikisi 2018-ci ildə həbs edilib. BMT Namazinin əsassız olaraq tutulduğunu bildirib. O, “düşmən” dövlətlə əlaqə saxlamaqda günahlandırılır. ABŞ isə İranı ölkəyə səfər edən xarici vətəndaşları “girov” götürməkdə ittiham edir.
Keçən ilin iyununda “The New York Times” qəzeti Namazinin rəy yazısını dərc edib və Baydenin İrandakı ABŞ məhbuslarını xilas etmək təklifinin uğursuzluqla nəticələndiyini yazıb. Namazi bu ilin yanvar ayında 7 günlük aclıq aksiyası keçirib və Baydenə yazdığı açıq məktubunda onları evə gətirmək vədini yerinə yetirməyə çağırıb.
Ağ Ev sözçüsü İranın ABŞ məhbuslarını həbs etməsini pisləyib və bunun qeyri-insani və beynəlxalq normalara zidd olduğunu deyib. Sözçü ABŞ-ın xaricdə haqsız yerə həbs edilən ABŞ vətəndaşlarının azadlığının təmin edilməsinə sadiq olduğunu və Namazinin ailəsi ilə müntəzəm əlaqə saxladığını bildirib.
ABŞ və digər Qərb ölkələri mütəmadi olaraq Tehranı ikili vətəndaşları Qərblə danışıqlarda siyasi üsul kimi saxlamaqda ittiham edirlər. Tehran və Vaşinqton arasında olan danışıq qrupları isə bir ilə yaxındır ki, toplanmır. İranda davam edən iğtişaşlar danışıqlara sarsıdıcı zərbə vurub.
Hüseyn RƏHİMZADƏ