Kanadada İran İslam Keşikçiləri Ordusuna bağlı olanların ölkədən çıxarılması uğrunda hərəkat başlanıb. Mühafizəkarlar Partiyasının lideri Pyer Pualyevr “İran İnternational”a müsahibəsində bildirib:
–Biz Kanadadan SEPAH-ın çıxarılmasını təmin edəcəyik. Biz polis, kəşfiyyat və digər təhlükəsizlik qurumlarının köməyi ilə SEPAH-la əlaqəli insanları müəyyən edərək Kanada torpaqlarından deportasiya olunmalarını təmin edəcəyik. Biz SEPAH-a hər hansı yardımı cinayət hesab edirik. SEPAH agentləri terrorçuları dəstəkləyir və Kanada vətəndaşlarını təhdid və təqib edir.
Beləliklə daha bir ölkə SEPAH-ın əl-qolunu yığışdırmaq və ondan canını qurtarmaq niyyətindədir.
Xatırladaq ki, Kanada bundan əvvəl SEPAH-ın komandanı general-mayor Hüseyn Salamiyə sanksiya tətbiq edib. Bu barədə Kanadanın xarici işlər naziri Melani Colinin bəyanatında bildirilib ki, SEPAH-ın Qüds qüvvələrinin komandanı general İsmayıl Qaani də sanksiyaya məruz qalıb. Bundan başqa, sanksiya tətbiq edilənlər arasında İranın əxlaq polisi və onun rəhbəri, eyni zamanda, İranın kəşfiyyat naziri (ETTELAAT) Seyid İsmayıl Xətib və onun rəhbərlik etdiyi qurum da var.
Ümumilikdə, sanksiyalar 25 fiziki və 9 hüquqi şəxsi əhatə edir.
Rəhman GƏNCƏLİ