Dünən Nigeriyada prezident və parlament seçkiləri keçirilib. Seçkilərlə əlaqədar yüksək təhlükəsizlik tədbirləri görülüb.
Qeyd edək ki, seçkilər bütün Afrika ölkələrinin diqqət mərkəzində idi. Belə ki, Nigeriya həm əhalinin sayına (213 milyon nəfər), həm də ümumdaxili məhsulun həcminə görə qitənin aparıcı ölkəsidir.
Prezident postu uğrunda aralarında bir qadının olduğu 18 namizəd mübarizə aparıb. Ölkə konstitusiyasına əsasən, hazırkı Prezident Məhəmməd Buxari bu vəzifəyə iki dəfə seçildiyi üçün seçkilərdə iştirak edə bilməz.
Ölkədə prezident seçkiləri ilə birgə parlament seçkiləri də keçirilib. Senatda 109 yer uğrunda 1101 namizəd, Nümayəndələr Palatasında (parlamentin aşağı palatası) 360 mandat uğrunda isə 3 min 122 namizəd mübarizə aparıb.
Seçki günü təhlükəsizliyin təmin olunmasına Nigeriya polisinin və güc strukturlarının 400 mindən çox əməkdaşı cəlb edilib. Hakimiyyət orqanları quru sərhədlərini bağlayıb, vətəndaşların hərəkətinə məhdudiyyətlər qoyub.
Dünən gecə seçkilərin ilkin nəticələri açıqlanıb. Rəsmi nəticələr isə yaxın günlər ərzində məlum olacaq.
Hazırladı:
M.HACIXANLI,
“Xalq qəzeti”
.jpg)
