Azərbaycan Prezidenti İlham Əliyevin 2024-cü il 1 mart tarixli Fərmanı ilə təsdiq edilən “Enerji Effektivliyi Fondunun vəsaitlərinin formalaşdırılması və istifadə Qaydası” “Enerji resurslarından səmərəli istifadə və enerji effektivliyi haqqında” Qanunun 16.4-cü maddəsinə uyğun olaraq hazırlanıb. Həmin Qayda ilə Enerji Effektivliyi Fondunun vəsaitinin formalaşdırılması və ondan istifadə ilə əlaqədar hüquqi və təşkilati məsələlər tənzimlənib.
Fond enerji resurslarından səmərəli istifadə və enerji effektivliyi üzrə tədbirlərin stimullaşdırılması, habelə təşviqi məqsədilə yaradılıb və dövlət başçısının müvafiq fərmanı ilə Enerji Məsələlərini Tənzimləmə Agentliyi qismində Energetika Nazirliyi fondun vəsaitinin sərəncamçısı kimi müəyyən edilib. Adı çəkilən nazirliyə, eyni zamanda, fondun vəsaitinin formalaşdırılmasına və idarə olunmasına ümumi nəzarətin həyata keçirilməsi tapşırılıb.
Qaydaya əsasən, kreditlər Energetika Nazirliyi yanında Enerji Məsələləri Tənzimləmə Agentliyi tərəfindən müvəkkil kredit təşkilatları vasitəsilə veriləcək. Hər bir layihə üzrə fondun vəsaitindən müəyyən hədlərdə güzəştli kredit ayrılacaq. Belə ki, vəsitlər kiçik (min manatdan 50 min manata qədər), orta (50 min manatdan 1 milyon manata qədər) və böyük kreditlər (1 milyon manatdan 10 milyon manata qədər) üzrə müəyyən ediləcək. Kiçik kreditlər 5 il, orta kreditlər 10 il, böyük kreditlər isə 15 il müddətində ödəniləcək.
Güzəştli kreditlər üzrə illik faiz dərəcələrinin yuxarı həddini Enerji Məsələləri Tənzimləmə Agentliyi müəyyən edir. Fiziki və ya hüquqi şəxs aldığı güzəştli kredit üzrə faiz borclarını müqavilə şərtlərinə uyğun olaraq hər ay, əsas borcu isə güzəşt müddəti bitdikdən sonra qalan müddət ərzində növbəti aydan etibarən bərabər hissələrə bölünməklə ödəməlidir.
Sənəddə müvəkkil kredit təşkilatların müəyyən meyarlara uyğunluğu da öz ifadəsini tapıb. Belə ki, müvəkkil kredit təşkilatların fəaliyyətində Azərbaycan Mərkəzi Bankının müəyyənləşdirdiyi minimum məcmu kapital, kapital adekvatlığı və likvidlik əmsalları üzrə prudensial tələblərə cavab vermələri nəzərdə tutulub. Eyni zamanda, Qaydada son 2 ildə kredit portfelində (2016-cı il yanvarın 1-dən əvvəl verilib sonradan restrukturizasiya edilmiş kreditlər istisna olmaqla) qeyri-işlək kreditlərinin (balansdan silinmiş kreditlərin qalıqları nəzərə alınmaqla) payı 10 faizdən yuxarı olmaması qeyd edilib.
Sənədlərdə aradan qaldırılması mümkün olan çatışmazlıqlar aşkarlandıqda, həmin çatışmazlıqların aradan qaldırılmasının zəruriliyi və formal tələblərə əməl olunmamasının hüquqi nəticələri müraciət edən şəxsə bildiriləcək. Çatışmazlıqlar ən geci 10 iş günü müddətində aradan qaldırılmadıqda, müraciətin baxılmamış saxlanılması haqqında qərar qəbul olunacaq və bu barədə məlumat müraciət edən şəxsə 3 iş günü müddətində təqdim ediləcək.
Yeri gəlmişkən, sənəddə adı vurğulanan kredit təşkilatları güzəştli kredit vəsaitinin fiziki və ya hüquqi şəxslərə çatdırılması üçün Energetika Nazirliyinin tabeliyindəki Enerji Məsələlərini Tənzimləmə Agentliyi ilə müqavilə bağlayan və sözügedən qaydanın 4.4-cü bəndində nəzərdə tutulan meyarlara cavab verən banklar və bank olmayan kredit qurumlarıdır.
Qaydaya görə, fiziki və ya hüquqi şəxslər barədə təqdim edilən ərizədə nəzərdə tutulan məlumatlar Elektron Hökumət İnformasiya Sistemi vasitəsilə əldə olunur. Müvəkkil kredit təşkilatı Enerji Məsələləri Tənzimləmə Agentliyinin müəyyənləşdirdiyi layihələrin tərtib olunmasına dair minimal tələbləri təhlil edərək, layihəyə güzəştli kreditin ayrılması və ya imtina barədə ilkin qərarını fiziki və ya hüquqi şəxsə bildirir. Həmçinin layihənin maliyyələşdirilməsi müvəkkil kredit təşkilatı ilə fiziki və ya hüquqi şəxs arasında bağlanılan müqavilə əsasında həyata keçirilir.
Müvəkkil kredit təşkilatları tərəfindən layihələri maliyyələşdirilən fiziki və ya hüquqi şəxslər haqqında hər rüb bitdikdən sonra növbəti ayın ilk 5 bank günündən gec olmayaraq sözügedən agentliyə məlumat verilir. Təqdim olunacaq məlumatın forması Energetika Nazirliyi tərəfindən müəyyənləşdirilir.
Müvəkkil bankların fonddan cəlb etdikləri vəsaitin ümumi məbləğinin qalığı onların məcmu kapitalının, bank olmayan kredit təşkilatlarının isə nizamnamə kapitalının 100 faizinə qədər ola bilər.
Kredit təşkilatının müraciəti əsasında ayrılmış ilkin vəsait üzrə maliyyə ilinin başa çatmasına 3 ay qalana qədər, əlavə olaraq ayrılmış vəsait üzrə isə ilin sonuna 1 ay qalana qədər 80 faizdən az istifadə edilərsə, vəsaitin istifadə olunmayan hissəsinə yuxarı hədd müəyyənləşdirilən tarixdən etibarən müvafiq şəkildə oktyabrın 1-nə qədər və ya dekabrın 1-nə qədər hər təqvim günü üçün 0,02 faiz cərimə hesablanır.
Müvəkkil kredit təşkilatı həmin vəsaitin Enerji Effektivliyi Fonduna köçürülməsini gecikdirdikdə, “Enerji effektivliyi fondunun vəsaitlərinin formalaşdırılması və istifadə Qaydası”na uyğun olaraq cərimə ödəməlidir. Gecikdirmə 30 iş günündən çox olarsa, Enerji Məsələləri Tənzimləmə Agentliyi müvəkkil kredit təşkilatına yeni vəsait ayrılmasını dayandıra və ya müvəkkil kredit təşkilatı kimi onun xidmətindən imtina edə bilər.
Müvəkkil kredit təşkilatı istifadə etdiyi vəsait üzrə əsas borcu və hesablanmış faizləri adı çəkilən agentliklə bağladığı müqaviləyə uyğun olaraq, hər ay üzrə növbəti ayın 3 iş günündən gec olmayaraq Enerji Məsələləri Tənzimləmə Agentliyinə ödəməlidir.
Fors-major hadisələrlə bağlı şəraitin əhəmiyyətli dərəcədə dəyişməsi səbəbindən agentliyin müəyyən etdiyi qaydada müvəkkil kredit təşkilatlarının həmin qurumun qarşısındakı borc öhdəliyinin restrukturizasiyası (öhdəliyin icrasına möhlət verilməsi) həyata keçirilə bilər.
Fiziki və ya hüquqi şəxs tərəfindən güzəştli kreditlər, faizlər və digər öhdəliklər üzrə ödənişlərin həyata keçirilməsindən asılı olmayaraq, müvəkkil kredit təşkilatı agentlik qarşısında öz öhdəliklərini müqavilə şərtlərinə uyğun olaraq yerinə yetirməlidir. Müvəkkil kredit təşkilatı agentlik qarşısında öhdəliklərinin gecikdirildiyi hər gün üçün, lakin 120 gündən çox olmamaq şərtilə, köçürülməyən vəsaitin 0,1 faizi qədər cərimə ödəyir. Müvəkkil kredit təşkilatı öhdəliklərini icra etmədikdə, agentlik Enerji Effektivliyi Fondunun vəsaitinin qaytarılması üçün tədbirlər görür.
Vaqif BAYRAMOV
XQ