Bu il ticarət dövriyyəsi 6,7 milyard dollara çatıb
“Azərbaycanla Türkiyə arasında münasibətlər digər dövlətlərə örnəkdir, cox güclü siyasi münasibətlərimiz var. Biz istəyirik ki, “Bir millət, iki dövlət şüarı” ilə inkişaf edən bu münasibətlər iqtisadi sahədə də özünü göstərsin və biz iş adamları ilə birlikdə daha da irəli gedəcəyik”. Bunu ölkəmizdə səfərdə olan Türkiyənin vitse-prezidenti Cevdet Yılmaz Bakıda Azərbaycanda fəaliyyət göstərən türk iş adamlarının iştirakı ilə keçirilən “İş dünyasının görüşü” adlı tədbirdə deyib.
Azərbaycanla Türkiyənin inkişaf etdirdiyi bu münasibətlərin bütün Qafqaz üçün rifah olduğunu söyləyən qardaş ölkənin vitse-prezidenti bildirib ki, dostluq münasibətlərinə əsaslanan əlaqələrin digər qardaş ölkələri də əhatəsinə alaraq çoxtərəfli forma alması, bölgədə də rifah əldə edilməsi üçün birgə səy göstərilir. Hazırda dünya iqtisadiyyatının yaxşı vəziyyətdə olmadığını vurğulayan Cevdet Yılmaz deyib ki, beynəlxalq iqtisadiyyat, hələ ki, özünə gəlməyib. “Dünyada ticarət həcmi azalıb. Amma biz bunu bilirik ki, çətin şərtlər fürsətlər yaradır. Biz istəyirik ki, daha çox iş adamı Azərbaycana gəlsin, daha çox iş adamı Türkiyəyə getsin və bu münasibətlər daha da güclənsin. 2022-ci ildə iki dövlət arasında ticarət dövriyyəsinin həcmi 6 milyard ABŞ dolları olub. Ticarət dövriyyəsi bu ilin on bir ayı ərzində 6,7 milyard ABŞ dolları səviyyəsinə çatıb. Bu göstəricinin ilin sonuna kimi daha da artacağına əminəm”, – deyə o əlavə edib.
Qeyd edilib ki, son illər ölkələrimiz arasında münasibətlərin ən yüksək səviyyəyə çatması qarşılıqlı investisiya qoyuluşlarının da artmasına səbəb olub. Azərbaycan şirkətlərinin Türkiyəyə yatırdığı investisiyaların həcmi artıq 19,5 milyard ABŞ dollarını ötüb. Yeri gəlmişkən, Azərbaycan Mərkəzi Bankının məlumatına əsasən, 2023-cü ilin yanvar-sentyabr aylarında ölkəmizdən ən çox birbaşa investisiya Türkiyə iqtisadiyyatına yatırılıb. Hesabat dövründə Azərbaycandan qardaş ölkəyə yatırılan investisiyanın həcmi 1 milyard 760 milyon dollar təşkil edib ki, bu da illik müqayisədə 20 dəfə çoxdur. Ötən müddətdə Türkiyənin Azərbaycana yatırdığı investisiyaların həcmi isə 12 milyard ABŞ dollarına çatıb. Bununla yanaşı, Cevdet Yılmaz bu göstəricilərin daha da artmasına ümid etdiyini diqqətə çatdırıb.
Məlum olduğu kimi, hazırda Türkiyə Cümhuriyyəti, həm də ölkəmizin əsas ticarət tərəfdaşlarından biridir. Hazırda Türkiyənin həm idxalda, həm ixracda, həm də ikitərəfli dövriyyədə ölkəmizin ikinci əsas ticarət tərəfdaşı olması da bunu sübut edir. İki qardaş ölkə arasında ticarət əlaqələri isə davamlı olaraq artmaqdadır. Belə ki, 2022-ci ildə ölkələrimiz arasında ticarət dövriyyəsi əvvəlki ilə nisbətən 7,9 faiz artaraq 3,3 milyard ABŞ dolları təşkil edib. 2023-cü ilin yanvar-oktyabr aylarında isə bu göstərici 6,7 milyard dollara çatıb. Bununla belə, ölkələrimiz arasında ticarət əlaqələrinin daha da artırılması üçün imkanlar olduqca genişdir.
Son zamanlar bu məsələ dövlət başçıları səviyyəsində də ətraflı müzakirə olunub, idxal-ixrac əməliyyatlarının artırılması üçün imkanlar nəzərdən keçirilib. Təsadüfi deyil ki, Bakıda keçirilən “İş dünyasının görüşü” adlı tədbirdə vitse-prezident Cevdet Yılmaz deyib: “Azərbaycan və Türkiyə prezidentləri bizim üçün hədəf qoyublar ki, ölkələr arasında ticarət dövriyyəsinin həcmini 15 milyard ABŞ dollarına çatdıraq. Biz hər ötən il bu hədəfə yaxınlaşırıq. Ümid edirəm ki, ən qısa zamanda bu hədəfə çatacağıq”. Bu baxımdan Preferensial Ticarət Sazişini xatırladan vitse-prezident bunu ölkələrimiz arasında iqtisadi əlaqələrin genişləndirilməsi üçün vacib sənəd kimi dəyərləndirib.
Hazırda Türkiyədə Azərbaycan sərmayəli 2 mindən artıq şirkət fəaliyyət göstərir. Ümumilikdə, Türkiyəyə investisiya qoyan azərbaycanlı iş adamları həm firma sayı, həm də investisiya həcmi baxımından Mərkəzi Asiya və Qafqaz ölkələri arasında ilk yerdədir. Ölkəmizdə isə 5678 Türkiyə investisiyalı kommersiya qurumu qeydiyyatdadır. Onların da 4019-u enerji, sənaye, telekommunikasiya, kənd təsərrüfatı, qida, yüngül sənaye, nəqliyyat, ticarət və digər xidmət sektorlarında aktiv fəaliyyət göstərir. Türkiyəni təmsil edən şirkətlərin ölkəmizin inşaat sahəsindəki fəaliyyəti də diqqət çəkir. Təkcə onu qeyd etmək kifayətdir ki, qardaş ölkənin şirkətləri ötən müddətdə Azərbaycanın tikinti sahəsində 517 layihəyə imza atıblar. Türk şirkətləri, həmçinin Azərbaycanın işğaldan azad edilmiş ərazilərinin bərpasında da xüsusi fəallıq göstərirlər. Hazırda onların iştirakı ilə həmin ərazilərdə müxtəlif istiqamətlər üzrə 107 layihə həyata keçirilir.
Bütün bunları ölkələrimiz arasında münasibətlərin məntiqi nəticəsi kimi dəyərləndirən Türkiyənin vitse-prezidenti C.Yılmazın sözlərinə görə, bu layihələrin dəyəri 18 milyard ABŞ dolları olub. Bununla belə, o bildirib ki, ölkələrimiz arasında tikinti sahəsində əməkdaşlıq gələcəkdə daha da inkişaf etdiriləcək. O bildirib ki, gələn ilin fevralında Ankarada keçiriləcək birgə hökumətlərarası iqtisadi komissiyanın iclasında iş dünyası yenidən bir araya gələcək və həmin tədbirdə iki ölkənin ticarət və iqtisadi münasibətləri üçün yeni bir yol xəritəsi hazırlanacaq.
Yeri gəlmişkən, dekabrın 20-də Azərbaycan Respublikasının Prezidenti İlham Əliyevlə Türkiyə Respublikasının vitse-prezidenti Cevdet Yılmaz arasında keçirilən görüşdə də münasibətlərin hazırkı səviyyəsindən, ölkələrimiz arasında ticarət dövriyyəsinin Preferensial Ticarət Sazişinin imzalanmasından sonra daha da artmasından məmnunluq ifadə olunub. Eyni zamnada, gələn il Azərbaycan – Türkiyə hökumətlərarası komissiyanın iclasının keçirilməsi, eləcə də ölkələrimiz arasında əməkdaşlığın müxtəlif sahələrdə inkişaf perspektivləri müzakirə edilib. Söhbət zamanı, həmçinin beynəlxalq təşkilatlar, Türk Dövlətləri Təşkilatı çərçivəsində əməkdaşlıq, təşkilatın daha da gücləndirilməsi, digər qardaş türk ölkələri ilə işbirliyinin dərinləşdirilməsinə dair fikir mübadiləsi aparılıb.
Bu gün isə Bakıda ulu öndər Heydər Əliyevin anadan olmasının və Türkiyə Cümhuriyyətinin yaradılmasının 100-cü ildönümünə həsr edilmiş Azərbaycan–Türkiyə İnvestisiya Forumu öz işinə başlayacaq. İqtisadiyyat Nazirliyindən bildirilib ki, tədbirdə hər iki ölkədən dövlət qurumları və özəl sektoru təmsil edən 600-dən çox nümayəndə iştirak edəcək. Azərbaycan – Türkiyə əməkdaşlığının müxtəlif istiqamətlər üzrə genişləndirilməsi imkanları nəzərdən keçiriləcək, investisiya üzrə əməkdaşlıq sazişi və müqavilələri imzalanacaq. Forum çərçivəsində, həmçinin investisiya, ticarət, kənd təsərrüfatı, müdafiə sənayesi, “yaşıl” enerji, sağlamlıq turizmi sektorlarını əhatə edən panel sessiyalar keçiriləcək.
Mirbağır YAQUBZADƏ
XQ