“Azərbaycan Xəzər Dəniz Gəmiçiliyi” Qapalı Səhmdar Cəmiyyətinin (ASCO) Zığ gəmi təmiri və tikintisi zavodunda inşa olunan növbəti yedək gəmisi istismara verilib.
ASCO-dan XQ-yə verilən məlumata görə, Xəzər Dəniz Neft Donanmasının balansına qəbul edilən gəmi “Tərtərçay” adlandırılıb. Gəminin uzunluğu 26 metr, eni 6,7 metr, bortunun hündürlüyü 3 metr, suya oturumu 1,6 metr, dedveyti 14 tondur. 6 nəfərlik heyətlə idarə olunan yedək gəmisi 9 uzellə hərəkət edəcək və göyərtəsində 3 tonadək yük daşıya biləcək.
Qeyd edək ki, Zığ gəmi təmiri və tikintisi zavodunda geniş həcmdə peşəkar gəmi təmiri və dəniz mühəndislik xidmətləri göstərilir. 2017-ci ildən isə burada müvafiq sertifikatlaşma əsasında gəmilərin tikintisi də həyata keçirilir. Yeri gəlmişkən, “Tərtərçay” zavodun inşa etdiyi sayca ikinci gəmidir. Bundan öncə isə “ASCO 1” adlı eyni tipli gəmi inşa olunaraq təhvil verilib. Hazırda bu seriyadan olan daha 4 ədəd gəminin inşası davam edir. Həmin gəmilərin mərhələli şəkildə istismara verilməsi planlaşdırılır.
Üzən nəqliyyat vasitələrinin layihələndirilməsini ASCO-nun Xəzər Dəniz Layihə Elmi-Tədqiqat İnstitutunun mütəxəssisləri yerinə yetiriblər.
XQ