Torpaq ta qədimdən ruzi çeşməsi, bərəkət mənbəyi hesab edilib. Dini dəyərlərimizdə, elmi inkişafımızda da bu amil həmişə əsas götürülüb, torpağı əkib-becərməyin, məhsuldarlığının ilbəil artırılmasının yolları axtarılıb.
Torpağa münasibət bu gün də belədir. Sadəcə indi kənd təsərrüfatının özəyini təşkil edən torpağın becərilməsi daha çox innovativ yanaşma tələb edir. Sirr deyil ki, qlobal iqlim dəyişikliyi, mənşəyi bilinməyən xəstəliklər, eləcə də qəfil baş verən təbii fəlakətlər aylarla çəkilən zəhməti bir andaca məhv edə bilir. Deməli, kənd təsərrüfatı həm də riskli bir sahədir. Amma bütün bunlara baxmayaraq aqrar sahənin inkişafına elmi yanaşma, kimyəvi və üzvi preparatlardan vaxtında və düzgün istifadə əksər hallarda ümidləri doğruldur, məhsuldarlığı artırır.
Dövlət başçısı İlham Əliyevin dediyi kimi, ölkəmizdə kənd təsərrüfatının inkişafı, bu sahəyə göstərilən dövlət qayğısı yüksək ixtisaslı mütəxəssislərin yetişməsini də tələb edir. “Bu sahədə aparılan islahatlar sayəsində biz daha çox gəncin kənd təsərrüfatı üzrə mütəxəssis olmaq istədiyini və Aqrar Universitetdə bu peşəni seçmək istəyən gənclərin sayının artdığını görürük. Biz yeni elektron kənd təsərrüfatı sistemini həyata keçiririk. Bu, artıq bizə həyatımızın və iqtisadiyyatımızın mühüm sahəsinin səmərəliliyini artırmağa çox kömək edir. Çünki ölkə əhalisinin demək olar ki, 50 faizi kənd yerlərində yaşayır.
Beləliklə, əminəm ki, bu, bizim birgə həyata keçirə biləcəyimiz çox mühüm yeni layihə ola bilər. Ümumilikdə, Azərbaycan yeni texnologiyalara, innovasiyalara hazırdır. Biz artıq bunun üçün əhəmiyyətli insan kapitalı yaratmışıq və bizim dövlət xidmətləri, sosial xidmətlərlə bağlı texnologiyalarımız bu gün bəzi başqa ölkələr tərəfindən istifadə olunur. Ona görə də biz yeni texnologiyalara tam açığıq, çünki onlar yeni miqyasa, dinamizmə, tərəqqiyə, iş yerlərinə və rifaha gətirib çıxarır”. Ölkə Prezidentinin bu sözləri hazırda Azərbaycan Dövlət Aqrar Universitetinin yol xəritəsidir və kollektivin qarşıdakı hədəflərə doğru inamlı addımlarının əsasını təşkil edir.
Təhsil prosesinin və idarəetmənin daha da təkmilləşdirilməsi, beynəlxalq standartlara cavab verməsi üçün kollektivimiz son bir ildə az iş görməyib. Bu baxımdan elektronlaşma universitetdə strateji idarəetmənin təşkili və operativ reaksiyaların verilməsi üçün olduqca mühüm əhəmiyyət daşıyır. Hazırda bu proses yekunlaşma mərhələsindədir. Daha sonra isə 6 min 500-dən çox tələbənin akademik fəaliyyətinin həyata keçirilməsi üzrə tədrisin təşkili, seçmə fənlərin təyin olunması, əvvəlki illərdən akademik borcu yaranmış tələbələrin alt və fərdi qruplarda yerləşdirilməsi, akademik fəaliyyəti haqqında elektron arayış və transkriptlərin verilməsi, adambaşına maliyyələşmə prinsipi əsasında təhsil haqqı ödənişi və təqaüd məbləğlərinin müəyyənləşdirilməsi və digər işlər elektron qaydada həyata keçiriləcək.
Bununla yanaşı, universitet rəhbərliyi uğurlu kadr potensialının əldə olunmasında kənd təsərrüfatı müəssisələri ilə əməkdaşlığa böyük önəm verir. Təkcə, ötən bir il ərzində 20-dən çox müəssisə rəhbəri ilə görüşlər keçirilib. “GP İmişli Cotton” MMC, “Şərqi CO LTD” MMC, “AgroFood” MMC, “AgroTradeSupply” MMC, “Azərtütün” ASC və “Tabaterra Leaf” QSC, “IBC İrrigation Systems”, “Parlar” və digər şirkət nümayəndələri ilə birgə tədqiqat işlərinin aparılması, seminar və təlimlərin keçirilməsi, tələbələr üçün təcrübə proqramlarının təşkili, həmçinin, məzunların işə qəbul prosesi kimi bir çox məsələlər qarşılıqlı əməkdaşlıq çərçivəsində müzakirə olunub.
Təkcə onu göstərmək kifayətdir ki, Azərbaycan Dövlət Aqrar Universitetində son illərin ən yüksək qəbul göstəricisi (94,77 faiz) 2023-cü ildə olub. Bu isə abituriyentlərin aqrar təhsilə, kənd təsərrüfatı sahəsinə marağının artmasının bariz nümunəsidir. Təbii ki, uğurun əsasını yaradılan təhsil şəraiti təşkil edir. Qeyd edək ki, dövlətin xüsusi qayğısı isə hər an hiss olunur. Kənd təsərrüfatı ixtisaslarının dövlət tərəfindən maliyyələşməsi, əlavə təqaüdlərin verilməsi, yeni tədris korpusunun və tələbə evlərinin istifadəyə verilməsi bu uğuru şərtləndirən başlıca amillərdəndir.
Bəli, aqrar sahənin inkişafı dövlətin qarşısında duran ən vacib məsələlərdən biridir. Təbii ki, bu işin uğurlu icrasınin bir ağır yükü də Aqrar Universitet komandasının üzərinə düşür və kollektiv bu məsuliyyəti yaxşı dərk edir.
Elcan MƏMMƏDOV,
Azərbaycan Dövlət Aqrar Universiteti mətbuat şöbəsinin müdiri
