2022-ci ildə 68, bu ilin 9 ayında isə 62 yeni dövlət standartı qəbul edilib
Dünyada baş verən iqtisadi çağırışlara uyğun olaraq respublikamızda istehsal olunan malların texniki səviyyəsinin, bazarın və istehlakçıların tələblərinə, istehsal prosesinə, eləcə də keyfiyyətin qiymətləndirilməsinə, həmçinin xidmət sferasının təşkilinə müasir yanaşma tələb olunur. Bu mühüm amil nəzərə alınaraq hazırda ölkədə texniki tənzimləmə və milli standartlaşdırma sistemi beynəlxalq tələblərə uyğun formalaşdırılır, qanunvericilik və institusional sahədə konkret layihələr həyata keçirilir. Şübhəsiz ki, bu zaman “Azərbaycan Respublikasının milli iqtisadiyyat perspektivi üzrə Strateji Yol Xəritəsi” və “Milli standartlaşdırma sisteminin beynəlxalq tələblərə uyğunlaşdırılmasına dair 2023–2025-ci illər üçün Dövlət Proqramı”nda bu istiqamətdə qarşıya qoyulan konkret tədbirlərə əsaslanılır.
Yüksək səviyyədə inkişaf etmiş iqtisadiyyatın mühüm tərkib hissəsi kimi standartlaşdırmanın əhatə dairəsinə genişçeşidli istehsal və xidmət sektorları daxildir. Elm, texnika və texnologiyanın müasir tələblərinə cavab verən malların və xidmətlərin istehsalı, onların keyfiyyətinin diqqətdə saxlanılması, rəqabətədavamlılığının artırılması, habelə dünya bazarına çıxışının reallaşdırılması üçün keyfiyyət infrastrukturunun əsasını təşkil edən standartlaşdırma sisteminin təkmilləşdirilməsi dövlətin və iqtisadiyyatın inkişafında xüsusi əhəmiyyətə malikdir.
Bütün bunlar nəzərə alınaraq ölkəmizdə milli standartlaşdırma sisteminin beynəlxalq tələblərə uyğunlaşdırılması, məhsulların təhlükəsizliyi, keyfiyyəti, rəqabət qabiliyyəti və ixrac potensialının artırılması istiqamətində son illər bir sıra layihələr həyata həyata keçirilib. İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin tabeliyində olan Azərbaycan Standartlaşdırma və Almaniyanın Fiziki-Texniki Federal institutlarının birgə tədbirində bu barədə ətraflı danışılıb, insan sağlamlığının qorunmasında təhlükəsizlik normalarının daha da təkmilləşdirilməsi, təbii ehtiyatlardan, enerji resurslarından səmərəli istifadənin reallaşdırılması və iqtisadiyyatın inkişafında standartlaşdırmanın rolunun əhəmiyyəti vurğulanıb.
Qeyd edək ki, bu gün respublikamızda məhsul və xidmətlərin keyfiyyətinin və rəqabət qabiliyyətinin yüksəldilməsini təmin edən standartların qəbulu ilə əlaqədar islahatların gerçəkləşdirilməsi daim diqqət mərkəzində saxlanılıb. “Milli standartlaşdırma sisteminin beynəlxalq tələblərə uyğunlaşdırılmasına dair 2023–2025-ci illər üçün Dövlət Proqramı” çərçivəsində görülən işlər, yeni standartların tətbiqi ilə optimallaşdırılan proseslər və ixrac potensialının artırılması istiqamətində reallaşdırılan tədbirlər müsbət nəticələrlə müşahidə olunub. Bununla da keyfiyyət infrastrukturunun inkişafı və tənzimlənməsində standartlaşdırma sahəsinin yeni mərhələyə keçidi üçün əlverişli şərait yaradılıb.
Hazırda ölkəmizdə standartlaşdırmanın inkişaf etdirilməsi, beynəlxalq standartlarla əlaqələndirilməsi, müasir tələblərə cavab verən yeni milli standartların yaradılması ilə bu sahənin əhatə dairəsi daha da genişləndirilir. Dünyada gedən qloballaşma prosesinə inteqrasiya, ölkəmizin sosial və iqtisadi sahədəki inkişafı fonunda məhsul, istehsal prosesi, xidmət sahəsi və xidmət subyektlərinin standartlaşdırılması zərurəti bu prosesin sürətləndirilməsini şərtləndirir.
Bu gün iqtisadiyyatın bütün sahələrində müşahidə olunan inkişaf meyilləri, o cümlədən, biznes mühitində olan dəyişikliklər məhsul və xidmətlər sahəsində də standartlaşdırma səylərinin artırılmasını və müasir tələblərə cavab verməsini qarşıya mühüm vəzifə kimi qoyur. Çünki qloballaşma şəraitində müvafiq standartlara cavab verməyən məhsul və xidmətlərin mövcudluğu hamını narahat edir. Belə bir problem isə sosial-iqtisadi inkişafda standartlaşdırmanın əhəmiyyətini davamlı olaraq artırır. Bu baxımdan əhalinin müasir tələb və standartlara cavab verən məhsul və xidmətlərlə təmin edilməsi ölkəmizin iqtisadi inkişaf strategiyasının əsas məqsədlərindən biridir.
Ölkədə istehsal olunan qeyri-neft məhsullarının ixracında standartlaşdırma ilə əlaqədar ciddi şəkildə nəzərə çarpan problemlər hazırda həllini gözləyir. Bunun üçün, ilk növbədə, məhsul rəqabətqabiliyyətliliyin artırılması üçün həyata keçirilən tədbirlər çərçivəsində standartlaşdırmanın hüquqi bazasının müasir tələblərə uyğun olması zəruri amillərdən biridir. Həmçinin milli standartların beynəlxalq standartlara uyğunlaşdırılması da aktual məsələdir.
Son illər ərzində sosial-iqtisadi sahələrin standartlaşdırılması sahəsində dövlət tərəfindən müxtəlif istiqamətlərdə geniş tədbirlər həyata keçirilib, istehsal və xidmət sahəsində keyfiyyət göstəricilərinin beynəlxalq standartlara uyğunlaşdırılması diqqət mərkəzində saxlanılıb, bununla bağlı normativ-hüquqi aktlar təsdiqlənib, qanunvericilik bazası daha da möhkəmləndirilib.
Bu məsələ ilə əlaqədar Kiçik və Orta Biznesin İnkişaf Agentliyinin (KOBİA) fəaliyyəti daha çox diqqət çəkir. Çünki standartma siyasətinin həyata keçirilməsində dövlətlə yanaşı, özəl sektor da fəal iştirak edir. Bundan irəli gələrək adıçəkilən agentlik tərəfindən mütəmadi olaraq ölkəmizdə keçirilən sərgi və yarmarkalarda sahibkarların iştirakına, o cümlədən, mikro və kiçik sahibkarlıq subyektlərinin istehsal etdikləri məhsulların ticarət şəbəkələrində satışının genişləndirilməsinə müvafiq dəstək göstərilir və bu zaman biznes subyektlərindən məhsul və xidmətlərin müvafiq standartlara cavab verməsi tələb olunur.
Ötən dövr ərzində respublikamızda milli standartlaşdırma sisteminin beynəlxalq təcrübəyə uyğunlaşdırılması məqsədilə beynəlxalq və regional təşkilatlarla əməkdaşlıq əlaqələri qurulub, standartlaşdırma, akkreditasiya, uyğunluğun qiymətləndirilməsi, metrologiya sahələrində 20-dək hökumətlərarası saziş və qurumlararası anlaşma memorandumu imzalanıb. Azərbaycanda bu sahənin inkişafında önəmli rol oynayan Azərbaycan Standartlaşdırma İnstitutu (AZSTAND) hazırda Beynəlxalq Standartlaşdırma Təşkilatının (ISO) 32 texniki komitəsində təmsil olunur. Cari il AZSTAND tərəfindən keçirilən idarəetmə sistemləri standartları üzrə 9 təlimdə 267 iştirakçının təmsil olunması bunun bariz ifadəsidir.
Onu da deyək ki, AZSTAND publik hüquqi şəxs tərəfindən 2022-ci ildə beynəlxalq standartlara və müasir tələblərə uyğunlaşdırılmış 68 yeni dövlət standartı qəbul edilib.
Onu da xatırladaq ki, Azərbaycan–Türkiyə strateji tərəfdaşlıq əlaqələri çərçivəsində AZSTAND ilə Türk Standartları İnstitutu arasında əldə edilən anlaşmaya əsasən, ölkəmizin adıçəkilən standartlaşdırma təşkilatına respublika daxilində Türkiyənin 9 mindən çox milli standartının rəsmi nəşrlərini yaymaq hüququ verilib. Eyni zamanda, Türk Standartları İnstitutunun beynəlxalq tələblərə cavab verən milli standartarının ölkəmzidə tətbiqinə başlanılıb.
Ümumiyyətlə, hər iki dövlət qurumu qarşılıqlı təcrübədən faydalanmaq və ticarəti asanlaşdırmaq üçün standartlaşdırma, uyğunluğun qiymətləndirilməsi (sınaq, yoxlama, sertifikatlaşdırma və s.), təlimlər və digər sahələrdə qarşılıqlı əməkdaşlığın gücləndirilməsi məqsədi ilə fəaliyyətlərini daha fəal şəkildə davam etdirəcək.
Vaqif BAYRAMOV
XQ