Bu il avqustun 1-nə Azərbaycanda dövriyyədə olan ödəniş kartlarının sayı 2022-ci ilin eyni dövrü ilə müqayisədə 20 faiz artaraq 15 milyonu ötüb. Bu barədə Azərbaycan Mərkəzi Bankının Ödəniş sistemləri və hesablaşmalar departamentinin direktoru Kəmalə Qurbanova Bakıda keçirilən Azərbaycan–Türkiyə Fintex Forumunda məlumat verib.
O bildirib ki, hesabt dövründə ölkə daxilində bu kartlarla aparılan nağdsız ödənişlərin həcmi 2 dəfə artaraq 24 milyard manata çatıb. Departament direktorunun sözlərinə görə, ölkə daxilində kart ödənişlərində nağdsız dövriyyənin xüsusi çəkisi əvvəlki ilin eyni dövrünə nisbətən 12,3 faiz bəndi artaraq 53 faizə bərabər olub.
“Daha bir maraqlı göstərici isə bu gün POS-terminallarda aparılan hər 4 əməliyyatdan birinin “token” əməliyyatı, yəni mobil telefonlar və ya digər ağıllı cihazlar vasitəsilə olmasıdır. Bu isə Azərbaycan əhalisinin innovasiyalara açıq olduğunu göstərir”– deyə o əlavə edib.
XQ