“Azərişıq” Açıq Səhmdar Cəmiyyəti işğaldan azad olunmuş rayonlarımıza qayıdan sakinləri dayanıqlı və fasiləsiz elektrik enerjisi ilə təmin etmək üçün genişmiqyaslı tədbirlər həyata keçirir.
Hazırda ərazisinə görə Azərbaycanın ən böyük və yüksək dağlıq ərazidə yerləşən Kəlbəcər rayonunda sovet dövründə çəkilmiş köhnə xətlər yenisi ilə əvəzlənir.
“Azərişıq” ASC-dən verilən məlumata görə, rayonun Alagöllər, Zod, İstisu kimi relyefi çətin olan yüksəkliklərdə yerləşən ərazilər də artıq nura qərq olunub. Bugünlərdə isə Zar kəndi istiqamətində 35 kilovoltluq izolyasiyalı xətlərin çəkilişi üzrə işlərə başlanılıb. Hazırda kəndə elektrik enerjisinin verilməsi üçün dayaqlar basdırılır, xətlər çəkilir. Bununla yanaşı, rayonun Mərcimək, Yellicə və Ağqaya kəndləri istiqamətində də yenidənqurma işləri aparılır.
Ölkə Prezidenti İlham Əliyevin 2022-ci il iyunun 26-da təməlqoyma mərasimində iştirak etdiyi Kəlbəcər Rəqəmsal İdarəetmə Mərkəzinin tikintisi də sürətlə davam etdirilir. Mərkəz ən müasir avadanlıqlarla təchiz ediləcək. Bu da gələcəkdə Kəlbəcər rayonunun dayanıqlı və keyfiyyətli elektrik enerjisi ilə təmin olunmasında mühim rol oynayacaq.
“Xalq qəzeti”