Torpaq sahələrindən səmərəli istifadə, məhsuldarlığın yüksəldilməsi, yeni istehsal və emal sahələrinin yaradılması, müasir suvarma sistemlərinin tətbiqi üçün aqroparklar innovativ və əlverişli mexanizmdir. Aqroparklar həm də hər bir bölgənin infrastrukturuna yeni töhfələr verir, məşğulluq səviyyəsinin artırılmasında da əhəmiyyətli rol oynayır.
Aqroparkların yaradılması bir daha sübut edir ki, Prezident İlham Əliyevin rəhbərliyi ilə aqrar sahənin inkişafı istiqamətində görülən işlər, dövlətimizin başçısının bu sahənin təkmilləşdirilməsi və müasirləşdirilməsi üçün qəbul etdiyi qərarlar ölkəmizin hərtərəfli inkişafına yeni stimul verir. Bu baxımdan, Tərtərdə fermerlərin öz şəxsi vəsaiti hesabına yaratdıqları “Tərtər Aqropark” MMC-nin fəaliyyəti təqdirəlayiqdir. Tərtər rayonunda yaradılmış aqropark uzun illər formalaşdırılmış fərdi təsərrüfat aktivlərinin kapital qoyuluşuna yönəldılməsi ilə formalaşdırılıb.
Şirkətin nizamnamə kapitalı 770 min manatdır. Hazırda balans aktivləri 500 baş iribuynuzlu cins damazlıq heyvanlardan və ferma kompleksindən ibarətdir. Burada ən yüksək şərait yaradılıb, mal-qaraya vaxtlı-vaxtında yem verilir, qulluq olunur. Aqroparkda südlük-ətlik istiqamətli heyvanlar saxlanıldığından müəssisə ildə 1200 ton süd və 20 ton ət istehsal etmək imkanına sahibdir.
Heyvanların yemə olan tələbatı da əsasən daxili imkanlar hesabına ödənilir. Aqroparka məxsus sahələrdə buğda, arpa, qarğıdalı, yonca və çovdar əkilməsi üçün fermerlərin adında olan torpaq sahələri və kənd təsərrüfatı texnika və avadanlıqları qiymətləndirilərək əlavə kapital qoyuluşu çərçivəsində Aqroparkın balansına verilib.
Bundan başqa, “Tərtər Aqropark” MMC-yə güzəştli kreditlərin, vergi güzəştlərinin, subsidiyaların verilməsi, aqrolizinq xidmətlərinin göstərilməsi istiqamətindədə mühüm addımlar atılır. Məsələn, bu günlərdə Sahibkarlığın İnkişafı Fondu “Tərtər Aqropark” MMC-nin südlük istiqamətli heyvandarlığın inkişafı layihəsinə 200 min manat güzəştli kredit verilməsini təmin edib. Bu kredit stabil keyfiyyətli süd istehsalını təmin edəcək və rayonun süd məhsullarına tələbatının ödənilməsində əhəmiyyətli rol oynayacaq.
Bu gün “Tərtər Aqropark” MMC əhalinin keyfiyyətli süd və ət məhsulları ilə təmin olunmasında, kənd təsərrüfatı məhsullarının istehsalı üzrə yüksək məhsuldarlığın əldə edilməsində və regionda yeni iş yerlərinin yaradılmasında əhəmiyyətli rol oynayır. Eyni zamanda ölkəmizdə ərzaq təhlükəsizliyinin möhkəmlənməsinə, idxaldan asılılığın azaldılmasına mühüm töhfələr verir.
P. ƏFƏNDİYEV,
“Xalq qəzeti”nin bölgə müxbiri