Dövlət Gömrük Komitəsinin məlumatına görə, bu ilin ilk 6 ayı ərzində Azərbaycanla Çin arasında ticarət dövriyyəsi ötən ilin müvafiq dövrü ilə müqayisədə 37,7 faiz və ya 361,9 milyon dollar artaraq 1 milyard 321,8 milyon dollar təşkil edib.
I yarımildə respublikamızdan dost ölkəyə ixracın həcmi də 2022-ci ilin müvafiq dövrü ilə müqayisədə 3,2 dəfə və ya 38,2 milyon dollar artaraq 55,7 milyon dollara bərabər olub. Hesabat dövründə Çindən Azərbaycana idxalın həcmi isə 34,3 faiz və ya 323,7 milyon dollar artaraq 1 milyard 266,1 milyon dollara yüksəlib.
Ümumiyyətlə, iki ölkə arasında arasında ticarət dövriyyəsinin həcmi 30 ildə 800 dəfədən çox artıb. Başqa sözlə, Azərbaycanın Çinlə ticarət dövriyyəsinin həcmi 1992-ci ildə, diplomatik münasibətlərin başlanğıcında 1,49 milyon dollar olduğu halda, 2021-ci ildə 1,2 milyard dollara çatıb. Ötən ildə də ikitərəfli ticari- iqtisadi əlaqələr sağlam və sabit inkişaf tempini qoruyub, ticarət dövriyyəsi 2021-ci illə müqayisədə 23,5 faiz artaraq 2 milyard 159 milyon ABŞ dolları təşkil edib. Beləliklə, Çin Azərbaycanın dördüncü ən böyük ticarət tərəfdaşı kimi tanınıb.
Göründüyü kimi, ötən dövrdə qarşılıqlı etimad, hörmət və dostluğa əsaslanan Azərbaycan-Çin əlaqələri yüksələn xətlə inkişaf edib. Bu müsbət dinamika ölkələrimizi etibarlı tərəfdaşa çevirib. Dövlət başçıları Prezident İlham Əliyev və Si Cinpinin siyasi iradəsi və dostluğu ikitərəfli əməkdaşlığın inkişafında əsas hərəkətverici qüvvə kimi çıxış edib. İki ölkə arasında təşəkkül tapan yüksək səviyyəli əlaqələr iqtisadi tərəfdaşlığın gücləndirilməsi üçün geniş imkanlar yaradıb.
Azərbaycanın Çindəki ticarət nümayəndəsi Teymur Nadiroğlu mediaya müsahibəsində bildirib ki, Çində istehlak bazarında baş verən kiçilmə nəticəsində qısamüddətli perspektivdə bir sıra qida məhsullarımızın bu ölkəyə ixracında müəyyən azalma müşahidə edilsə də, uzunmüddətli perspektivdə mövcud bazarın Azərbaycan üçün önəmi daha da artacaq. İki ölkə arasında ticarət həcminin, xüsusən də respublikamızdan dost ölkəyə qeyri-neft məhsullarının ixracının artırılması iqtisadi əlaqələri daha da genişləndirəcək.
Çin dünyanın istehsal mərkəzi olduğu üçün burada xammala böyük tələbat var. Bu baxımdan ölkəmizdə istehsal olunan kimya sənayesinə aid məhsullara, xüsusən də polimerlərə olan tələbat daha çoxdur. Bununla yanaşı, Azərbaycan pambığına da çinli şirkətlər tərəfindən xüsusi maraq göstərilir.
Azərbaycan xalçaçılıq mədəniyyətinin Çində tanıdılması və xalçalarımızın bu ölkəyə ixracı ilə bağlı da davamlı tədbirlər həyata keçirilir. Xalçalarımız Çində fəaliyyət göstərən ticarət evlərimizdə nümayiş etdirilir. Xalçaçılıq mədəniyyətimizlə bağlı Çin dilində məlumatlar hazırlanıb müvafiq qurum və şirkətlərə göndərilir.
Artıq ilk dəfə olaraq əllə toxunulmuş Azərbaycan xalçalarının Çinə ixracı reallaşıb. Xalçalarımızın “Beijing Hualian Group” (BHG) şirkətinə məxsus bu ölkənin tanınan “SKP Mall” ticarət mərkəzindəki “SKP Home Selected” mağazasında satışı uğurla gerçəkləşib.
Azərbaycanın Çindəki ticarət nümayəndəsinin məlumatına əsasən Çin müxtəlif ölkələrin şərabçıları arasında böyük rəqabətə malik geniş şərab istehlakı bazarına malikdir. Belə ki, bu dövlət 70-dən çox ölkədən şərab məhsulları idxal edir. Artıq Azərbaycan şərabı da Çin idxalçıları və istehlakçıları arasında populyarlıq qazanır. Şübhəsiz ki, bu məsələdə ölkəmizdə çinli istehlakçıların marağını daha da artırmaq üçün şərab məhsullarının butik, orijinal, yüksək keyfiyyətli, münasib qiymətli olaraq ixracı istiqamətində tədbirlər həyata keçirilir.
Onu da qeyd edək ki, respublikamızın Çindəki ticarət nümayəndəliyi tərəfindən Azərbaycan şərabçılıq mədəniyyətinin və şərablarının bu ölkədə təbliğ edilməsi istiqamətində mütəmadi şəkildə müvafiq layihələr icra olunur. Bu məqsədlə 2018-ci ildən etibarən Çində bir neçə şəhərdə Azərbaycan Şərab və Ticarət Evi fəaliyyət göstərir. Hər il keçirilən sərgilərdə Azərbaycan şərabları nümayiş olunur. Eyni zamanda populyar somelyelərin iştirakı ilə Çində Azərbaycan şərablarının master-klas və dequstasiya tədbirləri təşkil edilir. Bu tədbirlər zamanı, xüsusilə “Bayan Şirə”, “Mədrəsə” və “Xindoqni” kimi Azərbaycanın aborigen üzüm sortlarından hazırlanan şərab məhsulları təbliğ olunur.
İki ölkə arasında əlaqələrin inkişafında mühüm rol oynayan Azərbaycanın Çində fəaliyyət göstərən ticarət evlərindən danışarkən, bir məqamı da xatırlatmaq istərdik. “Made in Azerbaijan” məhsullarının dost ölkəyə ixracının artırılmasında və bu ölkədə məhsullarımızın təbliğində 2018-ci ildən etibarən Şanxay, Urumçi, Çindao, Harbin, Cinan, Vuhan, Canciaciye kimi şəhərlərdə dörd ticarət evi, üç şərab evi və dörd ticarət bölməsi uğurla fəaliyyət göstərir. Bundan savayı, Çinin məşhur “JD.com” elektron ticarət platformasında onlayn “Azərbaycan Ticarət Evi” də İki ölkə arasında ticari-iqtisadi əlaqələrin inkişafına mühüm təsir göstərir.
Xatırladaq ki, sözügedən ticarət evləri, eləcə də “JD.com” elektron ticarət platforması “Made in Azerbaijan” məhsulları ilə yanaşı, ölkəmizin investisiya, nəqliyyat-tranzit və turizm potensialının təbliğində də önəmli vasitə kimi nüfuz qazanıb. Bu cür ticarət evlərinin sayının artması isə daha çox çinli vətəndaşın ölkəmizlə yaxından tanış olmaq imkanı yaradır.
İki ölkə arasında ticari-iqtisadi əməkdaşlıqdan bəhs edərkən, bir məqamı da xatırladaq. Bu da Çin şirkətlərinin Azərbaycana sərmayə marağının dəyərləndirilməsi və respublikamızın investisiya mühitinin Çində təbliği vəziyyəti ilə bağlıdır. Bununla bağlı bildirək ki, 1995-ci ildən indiyədək bu ölkə sərmayədarları tərəfindən respublikamıza ümumilikdə 900 milyon ABŞ dollarından çox birbaşa investisiya yatırılıb. Azərbaycanda 200-dən çox Çin kapitallı şirkət qeydiyyatdan keçib və bu rəqəm ildən-ilə artmaqdadır. Çin şirkətləri Azərbaycanda sənaye, enerji, infrastruktur, informasiya texnologiyaları, ticarət, kənd təsərrüfatı və digər sahələrdə uğurla fəaliyyət göstərirlər.
Prezident İlham Əliyev tərəfindən təsdiqlənən “Azərbaycan 2030: sosial-iqtisadi inkişafa dair Milli Prioritetlər”də 5-ci prioritet “Təmiz ətraf mühit və “yaşıl artım” ölkəsi kimi müəyyənləşdirilib. Bununla yanaşı, dövlətimizin başçısının tapşırığına əsasən işğaldan azad edilən ərazilərdə “Yaşıl enerji” zonasının yaradılması nəzərdə tutulub. Bu baxımdan alternativ və bərpaolunan enerji sahəsində iki ölkə arasında böyük əməkdaşlıq potensialı mövcuddur və hazırda çinli investorlar tərəfindən bu sahəyə böyük maraq göstərilir. Bütün bunlarla bərabər, yaxın gələcəkdə respublikamızda Azərbaycan-Çin Sənaye Parkının qurulması da nəzərdə tutulur.
V.BİNYATOĞLU, “Xalq qəzeti”