“ATA (“Amec”-“Tekfen”-“Azfen”) yard” sahəsində inşa edilmiş “Azəri-Mərkəzi-Şərqi” (ACE) platformasının üst modulu dənizdəki əməliyyat yerinə çatdırılması üçün “Azərbaycan Xəzər Dəniz Gəmiçiliyi” QSC-nin (ASCO) “STB-1” barjına yüklənib.
“Azərbaycan Xəzər Dəniz Gəmiçiliyi”nin məlumatına görə, qurğunun barja yüklənməsi prosesi təhlükəsiz şəkildə yerinə yetirilib. ACE platformasının üst modulunun çəkisi 19 min 600 ton, hündürlüyü isə 36 metrdir.
Qeyd edək ki, “Azəri-Mərkəzi-Şərqi” layihəsində istismar olunması üçün ASCO-nun “STB-1” barjında ötən il zəruri modifikasiya işləri aparılıb. Barjın tələb olunan dərəcə üzrə sertifikasiyası yenilənib. Yeri gəlmişkən, Xəzər dənizinin ən böyük barjı sayılan “STB-1”in uzunluğu 163, eni 45 metr, göyərtəyə yükgötürmə qabiliyyəti isə 18 min tondur.
“Xalq qəzeti”
