Bu günlərdə dünyanın enerji mərkəzlərinin diqqəti yenidən Azərbaycan paytaxtına yönəlib. Dünən Bakıda öz işinə başlayan Beynəlxalq enerji həftəsinin ilk günündə 28-ci beynəlxalq Xəzər neft və qaz sərgisinin təntənəli açılış mərasimi keçirilib. Xatırladaq ki, Azərbaycan paytaxtında 28-ci dəfə keçirilən builki sərgidə 37 ölkədən gəlmiş 326 şirkət iştirak edir. Onların bir çoxu ənənəvi neft-qaz sərgisinin daimi iştirakçıları olsalar da, bu mötəbər tədbirə ilk dəfə qoşulanlar da az deyil.
Xəzər regionunun ən nüfuzlu enerji tədbirinin açılışında Azərbaycan Prezidenti İlham Əliyevin, eləcə də bir çox dünya ölkələrinin dövlət xadimlərinin, şirkət nümayəndələrinin, yüksək səviyyəli qonaqların və beynəlxalq enerji ekspertlərinin iştirakı sərginin əhəmiyyətini qat-qat artırırdı. Məlum olduğu kimi, Azərbaycan paytaxtı artıq uzun müddətdir ki, nüfuzlu tədbirlərin təşkil edildiyi və mühüm qərarların, əməkdaşlıqların müzakirə edildiyi məkana çevrilib. Bundan əlavə, ölkəmizin enerji sahəsində həyata keçirdiyi uğurlu siyasət nəticəsində respublikamız artıq enerji sektorunda öz sözünü deməyə müvəffəq olub. Belə ki, hazırda Azərbaycan yalnız özünün deyil, digər ölkələrin də enerji təhlükəsizliyinin təminatında mühüm rol oynayır.
Azərbaycanın həm regionda, həm də Avropada enerji təhlükəsizliyi sahəsində önəmli rol oynadığını bir daha təsdiqləyən Beynəlxalq enerji həftəsinin təşkilatçıları isə “Iteca Caspian” və “Caspian Event Oraganisers” və onların beynəlxalq tərəfdaşları–“İCA Events” və “CEM FZ LLC” şirkətləridir. Tədbirin baş sponsoru SOCAR, sponsorları isə AbuDhabi Port, ACWA Power, Ansaldo Energia, AZEL SYSTEMS, Azeri M-I Drilling Fluids, AZFEN, Baku Steel Company, bp, Caspian Drilling Company, Caspian Marine Services, Equinor, EP Absheron, Intertek, Global Energy Azerbaijan, GL, Inpex, KOLIN Construction, MASDAR, Tekfen, Total Energies, Turkish Petroleum, Uniper, Ural Steel şirkətləridir. Sponsorların geniş tərkibi isə, heç şübhəsiz, Bakı Beynəlxalq enerji həftəsinin nüfuzunu və yüksək statusunu təsdiqləyir.
Azərbaycan Respublikası Dövlət Neft Şirkəti SOCAR-ın ayrı-ayrı şirkət və müəssisələrinin öz nailiyyət və perspektivlərini geniş nümayiş etdirməsi tədbirə marağı qat-qat artırırdı. Bundan əlavə, ölkəmizdə həyata keçirilən iri neft-qaz layihələrinin opreatoru BP şirkəti, qardaş Türkiyənin TPAO, Fransanın Total, Azərbaycanda bərpaolunan enerji layihələrinin iştirakçısı olan Birləşmiş Ərəb Əmirliklərinin “Masdar” , Özbəkistanın “Uzbeknefteqaz” və dünyanın neft-qaz, nəqliyyat-logistika və təchizat sahələrində fəaliyyət göstərən onlarca firma və şirkəti öz qabaqcıl təcrübə və nailiyyətlərini sərgidə nümayiş etdirmək üçün yaxşı imkan qazanmışdılar. Yeri gəlmişkən, iştirakçıların istər bu müəssisələrin, istərsə də öz ekspozisiyalarını göstərən digər ölkələrin şirkətlərinin imkanları, nailiyyət və perspektivləri ilə yaxından maraqlanmaları bir daha sübut edirdi ki, ənənəvi Xəzər neft və qaz sərgisi beynəlxalq əməkdaşlıq meydanı kimi mühüm statusunu qoruyub saxlaya bilib. Elə sərgi barədə rəy və təəssüratlarını öyrəndiyimiz iştirakçılar da bu mötəbər tədbirdə əməkdaşlıq əlaqələrini genişləndirmək, sərginin yaratdığı imkanlardan səmərəli istifadə etmək məqsədində olduqlarını vurğulayırdılar.
İbrahim İbrahimov, “Atilla” transport xidmətləri şirkətinin kommersiya üzrə direktoru:
– Şirkətimiz ötən əsrin 90-cı illərinin sonlarında təsis edilib. 2000-ci illərin ortalarından etibarən neft-qaz sektorunda fəaliyyət göstərən 40-dan çox şirkətə nəqliyyat xidmətləri göstərməyə başlamışıq. Müştərilərimizə göstərdiyimiz nümunəvi xidmətlərə görə, Azərbaycanda təsis olunmuş şirkətlərarası milli mükafat–“İlin şirkəti” adına layiq görülmüşük. 2015-ci ildə isə Azərbaycanda həyata keçirilən iri neft-qaz layihələrinin operatoru olan BP şirkətinin elan etdiyi müsabiqənin qalibi olmuşuq.
Şirkətimiz hazırda sərnişindaşıma xidməti ilə yanaşı, avtomobil parklarının yenilənməsi, eləcə də sürücülərə təlim keçirilməsi sahələrində də fəaliyyət göstərir.
Xəzər neft-qaz sərgisinə gəldikdə isə, 2016-cı ildən etibarən bu mötəbər tədbirdə iştirak edirik. Təşkilatçılıq, hər il olduğu kimi, bu dəfə də yüksək səviyyədədir. Burada öz nailiyyətlərimizi nümayiş etdirməklə yanaşı, yeni şirkətlərlə də əməkdaşlıq imkanı qazanacağımıza ümid edirəm...
Vladimir Şlimak, “Caspian Drillinq Companу Ltd” şirkətinin baş direktorunun layihələr və mühəndislik işləri üzrə birinci müavini: –Qazma sahəsinin qabaqcıl şirkətlərindən olan “Caspian Drillinq Companу Ltd” 26 illik fəaliyyətə malikdir. Şirkətimiz Xəzər dənizinin qazma sənayesində xüsusi uğurları ilə tanınır. Hazırda şirkətin əsas heyəti neft və qaz sənayesində 30-35 illik beynəlxalq təcrübəyə malik qazma, geologiya, mühəndislik, dənizçilik, elektrik və mexanika sahələri üzrə peşəkar işçilərdən ibarətdir. Ümumilikdə, şirkətimizdə 650-dən çox əməkdaş çalışır.
Ötən müddətdə Xəzər dənizi regionunda qazma əməliyyatlarının yerinə yetrilməsi məqsədilə Dədə Qorqud, İstiqlal, və Heydər Əliyev qazma qurğuları şirkətimizin sərəncamına verilib. Şirkətimizin kəşfiyyat qazma əməliyyatları nəticəsində “Azəri-Çıraq-Günəşli” və “Şahdəniz” yataqları kəşf edilib.
“Caspian Drillinq Companу Ltd” şirkəti öz fəaliyyətini təkcə Xəzər dənizi ilə məhdudlaşdırmaq niyyətində deyil. Yaxın illərdə beynəlxalq neft və qaz layihələrində iştirak etməklə özümüzü dünya miqyasında tanıtdırmağa çalışırıq. Ötən müddətdə Türkiyə və İsraildə müəyyən kəşfiyyat qazması aparmışıq. Düşünürəm ki, “Xəzər neft-qaz” sərgisi bu baxımdan bizim üçün əla fürsətdir. Biz burada öz nailiyyətlərimizi nümayiş etdirməklə yanaşı, sərgi iştirakçıları olan digər şirkətlərin də uğurları ilə tanış oluruq. Bu baxımdan deməliyəm ki, bu tədbir beynəlxalq əməkdaşlıq üçün mühüm əhəmiyyət kəsb edir. Çünki burada iştirak edən bütün şirkətlər bir-birini daha yaxından tanımaq imkanı qazanırlar. Bir sözlə, burada hər şey möhtəşəmdir...
Murad Sadıxov, Birləşmiş Ərəb Əmirliklərinin “Masdar” şirkətinin Azərbaycan üzrə meneceri: – “Masdar” şirkəti 2006-cı ildə Əbu-Dabi hökuməti tərəfindən təsis olunub. Hazırda şirkətin üç təsisçisi var. Əsas fəaliyyət istiqamətimiz bərpaolunan enerji layihələrinin inkişaf etdirilməsindən ibarətdir. Şirkətimiz bərpaolunan enerji sahəsində həm Yaxın Şərq, həm də dünya üzrə liderdir. Hazırda 40-dan çox ölkədə fəaliyyət göstəririk. İstifadə etdiyimiz texnologiyalar günəş, külək və bionerji sahəsi ilə bağlıdır. Hazırda 20 min meqavatdan artıq istehsal gücünə nəzarət edirik.
“Masdar” şirkəti Azərbaycana ilk dəfə 2018-ci ildə ayaq basıb. Həmin il Azərbaycan hökuməti tərəfindən keçirilən tenderə dəvət alaraq iştirak etmişdik. 2021-ci ildə biz 230 meqavatlıq “Qaradağ” Günəş Elektrik Stansiyası layihəsinə imza atdıq. 2022-ci il martın 15-də Azərbaycan Prezidenti cənab İlham Əliyevin və Birləşmiş Ərəb Əmirliklərinin energetika naziri Suhail Mohamed Al Mazroueinin iştirakı ilə stansiyanın təməlqoyma mərasimi keçirildi. Ötən müddətdə işlərin sürtələ davam etdirilməsi nəticəsində tikinti qrafikini xeyli qabaqlamağa nail olmuşuq. Bu da bizə stansiyanı “Heydər Əliyev İli” elan olunmuş 2023-cü ilin sonlarınadək istifadəyə verməyə imkan yaradır. Azərbaycanın bərpaolunan enerji potensialı yüksək olduğundan bizim gələcəkdə də burada bir sıra yeni layihələrdə iştirak etməklə bağlı planlarımız var.
Xəzər neft-qaz sərgisində ikinci dəfədir, iştirak edirik. Bundan çox məmnunuq. Ötən il ilk iştirakımız bizə çox düşərli oldu. Belə ki, sərgidən dərhal sonra Azərbaycanın Energetika Nazirliyi tərəfindən Şuşada keçirilmiş xüsusi enerji konfransı keçirilmişdi. Həmin konfrans çərçivəsində biz iki yeni böyük müqavilə imzaladıq. Həmin müqavilələr quruda 2 min meqavat günəş və külək enerjisi stansiyalarının tikintisi və dənizdə külək və yaşıl hidrogen istehsalı ilə bağlıdır. Bununla da, Azərbaycanda 10 min meqavatlıq güc yaratmağa nail olacağıq.
İştirak etdiyimiz budəfəki sərgi olduqca möhtəşəmdir. Qeyd etmək istəyirəm ki, sərgidə iştirak etmək bizim üçün çox faydalıdır. Çünki biz burada yeni texnolgiyalar haqqında məlumat əldə edirik. Bu baxımdan özümüzü çox şanslı hesab edirik. Bu gün də Prezident İlham Əliyev bizim pavilyona baş çəkərək işlərimizlə maraqlandı. Ümid edirəm ki, cənab Prezident işlərimizdən çox razı qaldı...
Mirbağır YAQUBZADƏ, “Xalq qəzeti”