2022-ci ildə dövlət əsaslı vəsait qoyuluşu və işğaldan azad olunmuş ərazilərin yenidən qurulması və bərpası xərcləri 5 milyard 945,8 milyon manat təşkil edib. Bu da əvvəlki ilə nisbətən 26,9 faiz artım deməkdir. Bu, “Azərbaycan Respublikasının 2022-ci il dövlət büdcəsinin icrası haqqında” qanun layihəsinə və Azərbaycan Respublikasının 2022-ci il dövlət büdcəsinin icrasına dair illik hesabata Hesablama Palatasının rəyi"ndə əksini tapıb.
Hesabatda qeyd edilib ki, 2022-ci ildə işğaldan azad olunmuş ərazilərin yenidən qurulması və bərpası üçün dövlət büdcəsindən, ümumilikdə, 4 milyard 311 milyon manat vəsait ayrılıb. Ötən il işğaldan azad olunmuş ərazilərin yenidən qurulması və bərpası layihələrinin icrasına dövlət əsaslı vəsait qoyuluşundan yönəldilmiş vəsaitin həcmi 467,1 milyon manat olub.
İşğaldan azad olunmuş ərazilərin yenidən qurulması və bərpası üzrə icra edilən layihələrə əlavə olaraq Azərbaycan Avtomobil Yolları Dövlət Agentliyi tərəfindən hesabat ilinin oktyabr ayında 276 milyon manat, dekabr ayında isə 100 milyon manat, “Azərbaycan Dəmir Yolları” QSC tərəfindən isə 91 milyon manat yönəldilib.
Bütövlükdə isə, “Azərbaycan Respublikasının 2022-ci il dövlət büdcəsində işğaldan azad olunmuş ərazilərin yenidən qurulması və bərpası üçün nəzərdə tutulan vəsaitin bölgüsü”nə daxil olan layihələrin icrası xərcləri üzrə ilin sonuna icra edilmiş məbləğ 2 milyard 665,41 milyon manat təşkil edib ki, bu da təsdiq edilmiş göstəricinin 99,8 faizinə bərabərdir.
“Xalq qəzeti”