İqtisadiyyat naziri Mikayıl Cabbarovun başçılıq etdiyi nümayəndə heyəti Özbəkistana səfər edib.
Nazirlikdən AZƏRTAC-a bildirilib ki, əvvəlcə Daşkənddə Heydər Əliyev meydanında Ümummilli Liderin abidəsi ziyarət olunub, önünə gül dəstələri qoyulub, xatirəsi ehtiramla anılıb.
Səfər çərçivəsində nazir Mikayıl Cabbarov Özbəkistanın investisiyalar, sənaye və ticarət naziri Ləziz Kudratov ilə görüşüb. Nazir ölkələrimizin ikitərəfli münasibətlərinin uğurlu inkişafına xüsusi önəm verildiyini vurğulayıb. Qeyd edilib ki, xalqlarımızı dostluq münasibətləri, ortaq tarix, adət-ənənələr, mədəniyyət və dəyərlər birləşdirir. Dövlət başçılarının səfərləri, keçirilən yüksək səviyyəli görüşlər ölkələrimiz arasında strateji tərəfdaşlığın keyfiyyətcə yeni səviyyəyə yüksəlməsinə, qarşılıqlı faydalı əməkdaşlığın davamlı inkişafına təkan verib. Əldə olunmuş razılıqlara uyğun olaraq qısa müddət ərzində görülən işlər, tərəfdaşlığın gücləndirilməsi üçün həyata keçirilən nəticəyönümlü tədbirlər yüksək qiymətləndirilir. Bu baxımdan, qarşılıqlı iqtisadi əlaqələrin möhkəmləndirilməsi, səmərəli nəticələrin əldə olunması əsas hədəflərdəndir.
Ölkələrimiz arasında iqtisadi-ticarət tərəfdaşlığını inkişaf etdirmək məqsədilə görülən işlərə gəlincə, diqqətə çatdırılıb ki, Azərbaycan Respublikası ilə Özbəkistan Respublikası arasında əməkdaşlıq üzrə Birgə Hökumətlərarası Komissiyanın ötən ilin avqustunda keçirilmiş iclasında əldə olunmuş razılıqların uğurla həyata keçirilməsi istiqamətində məqsədyönlü addımlar atılır. Bildirilib ki, ötən il ölkələrimiz arasında ticarət dövriyyəsi nəzərəçarpacaq dərəcədə artıb. Bununla belə, ticarət sahəsində əməkdaşlığın genişləndirilməsi üçün böyük imkanlar var. Özbəkistanla qarşılıqlı investisiya qoyuluşu sahəsində tərəfdaşlığın gücləndirilməsi də xüsusi əhəmiyyət kəsb edir. İki ölkənin regionları və işgüzar dairələri arasında əlaqələri gücləndirməyə töhfə verəcək 1-ci Azərbaycan-Özbəkistan Regionlararası Forumunda imzalanacaq Azərbaycan-Özbəkistan İnvestisiya Fondunun yaradılması barədə hökumətlərarası Saziş də bu baxımdan önəmlidir. Sənəddə yer alan məsələlər qarşılıqlı investisiya qoyuluşları və ticarət dövriyyəsinin artırılmasına, iqtisadi əməkdaşlığın möhkəmləndirilməsinə xidmət edir.
Tədbirdə ticarət, investisiya, sənaye, “Araz Vadisi” İqtisadi Zonası və Ağdam sənaye parklarına, Ələt Azad İqtisadi Zonasına Özbəkistan şirkətlərinin cəlb edilməsi, rəqəmsal iqtisadiyyat və s. istiqamətlər üzrə tərəfdaşlıq üçün geniş potensial olduğu vurğulanıb, Özbəkistan iş adamları fəal əməkdaşlığa dəvət olunub.
Özbəkistanın investisiyalar, sənaye və ticarət naziri Ləziz Kudratov ölkəsinin Azərbaycanla müxtəlif istiqamətlər üzrə birgə layihələrin icrasında maraqlı olduğunu vurğulayıb, iqtisadi əlaqələrin genişləndirilməsi məqsədilə həyata keçirilən məqsədyönlü tədbirlərin, imzalanan sənədlərin əhəmiyyətini qeyd edib, tərəfdaşlığın inkişafı istiqamətində fikirlərini bölüşüb.
Görüşdə Azərbaycan-Özbəkistan Birgə Hökumətlərarası Komissiyası tərəfindən iqtisadi əməkdaşlığın gücləndirilməsi məqsədilə həyata keçirilən tədbirlər və qarşılıqlı investisiya qoyuluşlarının artırılması imkanları müzakirə olunub.