Futbol üzrə Avropa çempionatı 2024-ün qrup mərhələsindən sonrakı 2 günlük fasilə dünən başa çatıb. İyunun 29-da futbol həyəcanı yenidən azarkeşləri öz sehrinə salıb. Amma arxada qalan vaxt ərzində Almaniyadan gələn maraqlı xəbərlərin də ardı-arası kəsilməyib. 

Afərin, Gürcüstan!

Gürcüstan millisi təkcə Avropa çempionatına və­siqə qazanmaqla deyil, elə ilk avroda pley-offa yük­səlməklə tarix yazdı. Amma bu, son nailiyyət deyil. 

Qonşularımız üçüncü raundda Portuqaliyaya 2:0 hesabı ilə qalib gələrək, nəinki super sensasiya yarat­dılar, həm də turnirin tarixi rekorduna imza atdılar: FİFA reytinqində 74-cü pillədə yer alan komanda altıncı yeri tutan komandanı məğlub etdi. Portuqaliya ilə Gürcüs­tan arasında 68 pillə fərq var! Bu, əvvəllər heç vaxt ol­mayıb.

Üçüncü yerdən 1/8 finala vəsiqə qazanan millinin uğurunu ölkə bütün gecə qeyd edib. Gürcüstan milli­sinin lideri Xviça Kvaratsxeliya sevincini gizlətməyərək deyib: “Bu, gürcü futbolsevərlərinin həyatında ən gözəl gündür. Biz tarix yaratdıq - bunu edəcəyimizə heç kim inanmırdı. Heç kim Portuqaliyaya qalib gələ biləcəyi­mizə inanmırdı, amma biz bunu sübut etdik”. 

Serbiyada futbol istefası

Serbiya millisi Avro-2024-də, həqiqətən, uğursuz çıxış etdi. Üç matçda iki heç-heçə, bir məğlubiyyət...və cəmi bir qol vurulub. Ona görə də Draqan Stoy­koviçin komandası C qrupunda dördüncü yeri tut­du. 

Əlbəttə, bu acı nəticə, sadəcə, Serbiya futbol mə­murlarına təsirsiz ötüşə bilməzdi. Dəyişiklik lap yuxarı­dan başladı. Serbiya Futbol İttifaqının vitse-prezidenti Branislav Nedimoviç və baş katib Yovan Surbatoviç mil­li komanda evə dönməmiş istefa verdilər. Gözlənilir ki, millinin baş məşqçisi Stoykoviç də vəzifəsini itirsin.

Makkelinin sonu...

41 yaşlı hollandiyalı referi Danni Makkelinin Av­ro-2024-ün qrup mərhələsindən sonra bu turnirdəki matçlarda daha işləməyəcəyi barədə xəbər yayılıb. 

Hollandiyanın bir neçə KİV-i bildirir ki, Makkeli 2024-cü il Avropa çempionatının qrup mərhələsinin iki oyununda çalışıb: Almaniya – Macarıstan (2:0) və İtali­ya – Xorvatiya (1:1). İtaliya və Xorvatiya arasında keçi­rilən 3-cü tur matçından sonra bəzi azarkeşlərdə Mak­kelinin oyunun əsas vaxtına 8 dəqiqə əlavə etməsinin “məqsədəuyğunluğu” ilə bağlı suallar yaranıb. 

Oyundan sonra “Xorvatiya Futbol İttifaqı rəsmən şi­kayət edib. Onunla UEFA prezidenti Çeferin arasındakı “münasibət”, görünür, hakimlər komitəsinin qərarına tə­sir edib”. Nəticədə, Makkeli evə göndərilib.

İlqar RÜSTƏMOV
XQ