Barlı-bəhrəli “Qarabağ” baharı evlərimizin astanasındadır
Son günlər adı dillərimizdən düşməyən uzaq Portuqaliyanın “Braqa Municipial” stadionundan başlayan və Azərbaycanı tarixdə ilk dəfə UEFA Avropa Liqası turnirinin səkkizdəbir finalına aparan yolun son hissəsindəyik.
“Qarabağ”–“Braqa” rəqabətində 2-ci və həlledici raund döyüşü start ərəfəsindədir. Ölkə çempionumuz və indiki Premyer Liqamızın lideri birinci raunddan inamlı qələbə, hesabda bir qədər gözlənilməz, deməli, həm də gurultulu nəticə ilə ayrılsa da (4:2), hələ heç nə bitməyib. Ağdam komandasının tam qələbəsinə ürəkdən sevinmək üçün bu gün axşam, təxminən saat 23:35-də hakimin final işarəsini gözləməliyik.
Oyundan-oyuna təcrübəsi, ustalığı, nüfuzu, futbolun yaraşığı olan azarkeşləri, onlarla da birlikdə iddiaları artan “Qarabağ” Avroliqanın pley-off mərhələsinin 1-ci raundunun qəhrəmanı kimi Avropanın diqqətini daha çox cəlb etməyə başlayıb. Qurban Qurbanovun komandasının Eysebio, Kriştianu Ronaldu, Luiş Fiqu kimi dahi futbolçuların vətənində göstərdiyi və ev sahiblərini, sözün əsl mənasında, mat qoyan oyun Azərbaycan klubunun doğma sahillərdən uzaqlarda əzəmətli zəfər marşı idi.
Birdən-birə üç oyunçumuzun (bunun özü də bir tarixdir!) – qapıçı Andrey Lunyov, yarımmüdafiəçilər Abdulla Zubir və Marko Yankoviçin Avroliqanın pley-off mərhələsinin birinci həftəsinin rəmzi komandası heyətinə daxil edilməsi də Avropa futbolunun ali dairələrində Azərbaycanın ən yaxşı klubunun mükəmməl oyununun və möhtəşəm qələbəsinin yekdilliklə bəyənildiyini təsdiqləyir. Bu isə bir daha onu göstərir ki, gözəl oyun hamıda rəğbət hissi oyadır, heç kim ona biganə qalmır. “Qarabağ” da Braqada rəqibini məhz könülləri oxşayan, qəlbləri riqqətə gətirən tamaşa ilə fəth etdi. İndi qalır həmin mükəmməl oyunu Bakıda təkrar etmək.
“Braqa” isə, təbii ki, tamamilə başqa əhvaldadır, çox məyusdur, sərt tənqidlərə məruz qalıb, evdəki uğursuzluğun əvəzini səfərdə artıqlaması ilə çıxmaq istəyir. Ancaq məqsədə çatmağı bacaracaqmı?
Belə bir vəziyyətdə daha soyuqqanlı, daha təmkinli olmağın, son anadək yenilməz döyüşçü keyfiyyətləri göstərməyin vacibliyini yaxşı bilən “Qarabağ” öz tarixinə növbəti parlaq səhifə yazmağa çox yaxındır. Komanda bir həftə əvvəlki oyununun təsadüfi olmadığını sübuta yetirmək üçün, şübhəsiz, qüvvə və bacarığını əsirgəməyəcək.
Azərbaycan futbolunda bu bahar tamam başqa bahardır. Bu bahar barlı-bəhrəli “Qarabağ” baharı ola bilər. Onun artıq nəfəsi duyulur, evlərimizin astanasındadır. Elə hadisələri qabaqlayıb, istəyirsən qapıları taybatay açaraq, “xoş gəlmisən”, deyəsən.
Amma “Tofiq Bəhramov”da oyunun başlama vaxtını (21:45 ) gözləyək. Görüşə bütün biletlərin satıldığını, tribunalarda boş yerlərin qalmayacağını da artıq bilirik. Məhz bu gün, 2024-ün 22 fevral axşamı “Qarabağ”a dəstəyimiz daha güclü olacaq. Səkkizdəbir finalın qapısını birgə səylə açmalıyıq.
Oqtay BAYRAMOV,
Əməkdar jurnalist
.jpg)