II YAZI
2024-cü il ərzində Qubanın Azərbaycanın İdman Paytaxtı seçilməsi rayon sakinlərinin razılığına səbəb olub. Sevindirici haldır ki, digər bölgələrimiz kimi, bu gözəl diyarda da idmana maraq böyükdür. Bu yazıda, əsasən, rayonun kəndlərində idmanın inkişafından söhbət açacağıq.
Rayonda ən gözəl məkanlardan biri – Vəlvələçayın sahilində yerləşən eyni adlı kənddəki kikboksinq zalında gələcəyin döyüş ustaları yetişir. Zalda məşqi əslən Talabıqışlaq kəndindən olan Murad Səlimov keçir. O, əvvəllər kənddə idmanla məşğul olmaq üçün şərait olmadığından Quba rayonunun mərkəzində Əməkdar məşqçi, kikboksinq üzrə Azərbaycan millisinin böyük məşqçisi Telman Məhərrəmovun rəhbərliyi altında kikboksinqlə məşğul olub, nailiyyətlər qazanıb. M.Səlimov idmanın muay-tay növü üzrə klublar arasında keçirilən Avrasiya çempionudur. Hazırda kikboksinqin K1 versiyası üzrə peşəkar döyüşlərdə iştirak edir. Aktivində 2 qalibiyyət, 2 məğlubiyyət, 1 nokaut var. 27 yaşlı gənc artıq yetirmələrinin uğurları ilə fəxr edə bilər. Onlardan Elton Bağırov, Nicat Azadov Azərbaycan çempionları, Sənan Mirzəyev “Baku Open” və ölkə çempionatının mükafatçısıdır.
Telman Məhərrəmovla da görüşmək fürsəti qazanırıq.
Murad Səlimov kimi çoxlu yetirmələri olan T.Məhərrəmov, həm də bu idman növü üzrə Şimal bölməsinin rəhbəridir. Onun yetirmələrindən yeniyetmələr arasında dünya, gənclərin Avropa çempionu Murad Gəncəliyev, yeniyetmələr arasında qitə çempionatının mükafatçıları Emil Gəncəliyev, Elton Hacıyev, kişilər arasında dünya, gənclərin Avropa çempionatlarının mükafatçısı Allahverdi Dəmirov və digərlərinin adları böyük qürurla çəkilir. Telman müəllim bu gənclərin bəzilərinin 10 kilometrlərlə yol qət edərək məşqlərə gəldiyini deyir.
Onlardan Əliməmmədoba kəndindən olan Murad Gəncəliyevlə söhbətləşirik. Kənddə 11-ci sinifdə təhsil alan Murad İtaliyada 2022-ci ildə yeniyetmələr arasında keçirilən dünya çempionatında qızıl medal qazandıqdan 1 il sonra Türkiyədə, Avropa çempionatında gənclər arasında çempion olub. Həmin il qardaşı Emil isə yeniyetmələrin yarışında gümüş mükafatçı olub. Murad deyir ki, kəndlərində yalnız cüdo zalı fəaliyyət göstərir. Digər idman növləri ilə məşğul olmaq istəyən uşaqlar bunun üçün xeyli uzaq yol qət etməli olurlar.
Qubada daha bir idman növü üzrə mütəxəssislə tanış oluruq. “Quba” Taekvondo Klubunun direktoru, Quba rayon OEUGİŞM-in baş təlimatçısı, Əməkdar məşqçi Elşən Vəlibəyov taekvondonun Qubada 1992-ci ildən uğurla inkişaf etdiyini bildirdi. Özü və QRİOEUGİŞM baş məşqçisi kimi çalışan qardaşı Tural Vəlibəyov uzun illərdir ki, bu bölgədə məşqçi və mütəxəssis kimi saysız-hesabsız idmançı yetişdiriblər.
Elşən Vəlibəyov deyir:
– Klubumuz mərkəzdə yerləşsə də, Alekseyevka və Qaraçay kəndlərində də bölmələri var. Təkcə ötən il Gülşən Aydayeva, Məryəm Cəfərova, Əlmurad Rzayev, Humay Dadaşov, Səyyad Dadaşov Azərbaycan çempionatının qalib və mükafatçıları olublar. Tural Vəlibəyovun yetirməsi Səyyad Dadaşov həm də Avropa çempionudur.
Qubalı uşaqlar şahmata da maraq göstərirlər. Quba rayon İOEUGİŞM-in məşqçi-müəllimi, məktəblilər arasında dünya çempionu Şəhriyar İsgəndərov həm də Olimpiya Kompleksində uşaqlara bu intellektual idman növünün sirlərini öyrədir. O qeyd edir ki, 5-6 yaşdan başlayaraq həm qızlar, həm də oğlanlar həvəslə məşqlərə yazılırlar.
Qubanın Birinci Nügədi, eləcə də Əlməmmədoba kəndlərində cüdo zalları fəaliyyət göstərir. Məşqçi-müəllim Vaqif İsmayılovun dediyinə görə, idman qurğularında kənd uşaqları böyük həvəslə məşğul olurlar:
– Quba OİK ilə yanaşı, hər iki kənddə uşaq və yeniyetmələrə cüdonun sirlərini öyrədirəm. Sevindirici haldır ki, oğlanlarla yanaşı, qızlar da cüdoya maraq göstərirlər və məşqlərə həvəslə gəlirlər. Yetirmələrim ölkədaxili yarışlarda, eləcə də beynəlxalq turnirlərdə uğurlar qazanırlar.
Vaqif İsmayılov Beynəlxalq Cüdo Federasiyasının Akademiyasında təhsil alaraq biliklərini daha da zənginləşdirdiyini deyir.
Quba kəndlərində belə zalların fəaliyyəti çox vacibdir. Uşaqlar burada həm idmanla məşğul olaraq möhkəmlənir, həm də asudə vaxtlarını səmərəli keçirirlər.
Qubanın idman həyatından söz düşmüşkən güləş, gimnastika, ağırlıqqaldırma, boks, sambo, üzgüçülük və digər növlər üzrə uğurları da unutmaq olmaz. Bu il həmin nailiyyətlərin daha da artacağına heç bir şübhə yoxdur. Çünki bunun üçün potensial da var, zəmin də...
P.S. Qubaya səfərimizi planlaşdırarkən havanın soyuq və qarlı olacağından xəbərdar idik. Amma ilin bütün fəsillərində heyrətamiz və sirli təbiəti ilə insanı məftun edən bu bölgənin füsunkar gözəlliyi ilə qışda daha da cazibədar göründüyünü kim bilmir ki... Əminik ki, turizm mərkəzlərindən biri kimi məşhur olan Quba, həm də idman bölgəsi kimi də şöhrət qazanacaq.
Leyla QURBANOVA
XQ
Bakı–Quba–Bakı