Yanvarın 10-da Milli Olimpiya Komitəsində qurumun təsis etdiyi “İdman Filmləri və Proqramları Milli Televiziya Festivalı” ilə bağlı münsiflər heyətinin təqdimatı və mətbuat konfransı keçirilib.
Tədbirdə əvvəlcə festivalın rəsmi tanıtım çarxı təqdim olunub. Sonra festivalın münsiflər heyətinin üzvləri–Olimpiya çempionu, MOK-un vitse-prezidenti Zemfira Meftahətdinova (sədr), Azərbaycan Kinematoqrafçılar İttifaqının katibi, rejissor, ssenarist Oleq Səfərəliyev, “Vətən” Uşaq Yaradıcılıq Mərkəzinin təsisçisi Zəhra Quliyeva, “Bakılı oğlanlar” komandasının üzvü, rejissor və prodüser Ənvər Mansurov, Əməkdar jurnalist Xanlar Məmmədov KİV nümayəndələrinə təqdim olunub.
Festivalın baş prodüsseri, Avrasiya Televiziya və Radio Akademiyasının akademiki Arzu Qulamov layihənin ikinci dəfə həyata keçirildiyini deyib. Bildirib ki, əvvəlki festivala 70 layihə təqdim olunmuşdu və 4 nominasiya üzrə 40 layihə gündəliyə salınmışdı. Bu ildən festivala ictimai qurumlar və özəl şirkətlər də maraq göstərir. İndiyədək artıq 15–20 layihə təqdim edilib. 5 nominasiya üzrə keçiriləcək festivalda qaliblər “Oskar” sistemi ilə müəyyənləşəcək. İki nominasiya qadın idmançılara həsr edilib. Bunlar “Zərif qəhrəman”, uşaq və yeniyetmələrlə bağlı “Gələcəyin qalibləri” nominasiyasıdır.
Zemfira Meftahətdinova layihənin ölkəmizdə idmanın inkişafına, Olimpiya Hərəkatının təbliğinə böyük töhfələr verəcəyini bildirib. O, qadın idmanına da budəfəki layihədə yer ayrılmasının sevindirici hal olduğunu diqqətə çatdırıb.
Münsiflər heyətinin digər üzvləri Oleq Səfərəliyev, Ənvər Mansurov və Zəhra Quliyeva çıxış edərək festivalın uğurlu olacağına inandıqlarını bildiriblər.
Mətbuat konfransından sonra jurnalistlərə müsahibə verən MOK-un vitse-prezidenti Çingiz Hüseynzadə ilk layihənin MOK-un 30 illik yubileyinə həsr olunduğunu deyib. O bildirib ki, layihənin uğurlu alınması növbəti festivalların təşkili üçün şərait yaradıb:
– Festival iki ildən bir təşkil ediləcək. Çünki qısa müddət ərzində çox material ərsəyə gətirmək çətindir. MOK hər zaman Olimpiya idman növlərinin inkişafı üçün çalışıb. Məqsəd bu sahədə təbliğatı daha da artırmaq, həmçinin telekanallar və federasiyaların bu işdə fəal iştirakı üçün motivasiya yaratmaqdır.
Qeyd edək ki, layihə çərçivəsində müəyyən olunmuş nominasiyalar üzrə ən yaxşı işlər seçilərək qaliblər müəyyən ediləcək.
L.QURBANOVA
XQ