Sərbəst güləşçilərimiz komanda hesabında birinci olublar

Bakıda “Sərhədçi” İdman Mərkə­zində təşkil olunan hərbçilər arasında güləş üzrə 36-cı dünya çempionatında Azərbaycan ko­mandasının uğurlu çıxışı davam edir. Dünya güləşinin inkişafına böyük töhfələr verən Azərbaycan məktəbinin nümayəndələrinin qazandığı qələbələr bir-birini əvəz etdikcə artan gücümüz, qü­vvətimiz qəlbləri riqqətə gətirir. 

Ağzınacan dolu olan zalda azarkeş­lərin pəhləvanlarımıza verdikləri güc­lü dəstək xalqımızda qələbə ruhunun nə qədər yüksək olduğunu bir daha göstərir. Bu nüfuzlu yarışda sərbəst güləşçilərimiz tarix yazmağı bacarıb­lar. Pələvanlarımız ümumilikdə, 5 qızıl, 1 gümüş, 1 bürünc medalla komanda hesabında birinci yeri tutublar. 

Ən titullu güləşçilərimizdən biri, dəfələrlə dünya və Avropa çempionu Hacı Əliyev ilk dəfə qatıldığı hərbçilər arasında dünya çempionatının qalibi olub. O, müsahibəsində bu medalın onun üçün çox dəyərli olduğunu qeyd edib. Bütün qələbələrin onun üçün bö­yük önəm daşıdığını deyən güləşçinin əldə etdiyi yüksək nəticə onun yaxşı formada olduğunu göstərir. XXXI Yay Olimpiya Oyunlarında bürünc, Tokio Olimpiadasında isə gümüş medala sa­hib olan güləşçimiz Paris Yay Olimpiya Oyunlarında qızıl medal qazanmaq id­diasındadır. 

Mundialın daha bir qalibi Əli Rəhim­zadə (65 kq) ölkəmizdə belə mötəbər yarışın keçirilməsinin qürurverici oldu­ğunu bildirib. Güləşçi belə bir nüfuzlu yarışda qalib olduğu üçün çox sevindi­yini vurğulayıb:

–Xalçaya qızıl medal üçün çıxmış­dım. Məqsədim doğma divarlar ara­sında ən yüksək mükafatı qazanmaq idi. Dövlət Himnimizin sədaları altında Azərbaycan bayrağını zirvədə görmək şərəfli hissdir. Qələbəmi torpaqları­mızın azadlığı uğrunda canını qurban verən şəhidlərimizə həsr edirəm.

Eləcə də, digər sərbəst güləşçiləri­miz Turan Bayramov (74 kq), İbrahim Yusubov (92 kq), Orxan Abbasovun (79 kq) qızıl, Ceyhun Allahverdiyevin (61 kq) gümüş, Fərid Cabbarovun (86 kq) bürünc mükafatları komandamızın güclü potensialını göstərir. 

Qadın güləşçilərimizin dünya çem­pionatında nailiyyətlərini də xüsusi vurğulamaq olar. 17 yaşlı Ruzanna Məmmədovanın (59 kq) fəxri kürsü­nün ən yüksək pilləsində qərarlaşma­sı çox böyük nəticədir. 2022-ci ildə yeniyetmələr arasında dünya və Av­ropa çempionatlarının qızıl medalını almış istedadlı güləşçimiz daha böyük qələbələr qazanmağa qadir olduğunu göstərib. Gənc qızlar arasında daha bir istedadlı güləşçimiz, builki Avropa çempionatının bürünc mükafatçısı Jalə Əliyeva (57 kq) da dünya çempionatın­da fəxri kürsünün ən yüksək pilləsində yer almaqla, ona bəslənilən ümidləri doğruldub. Onun komanda yoldaşları Elnurə Məmmədovanın (50 kq) gü­müş, Gültəkin Şirinova (53 kq), Nərgiz Səmədovanın (55 kq) bürünc mükafat­ları da diqqətəlayiq uğurlardır. Bununla da, qadın millimiz 2 qızıl, 1 gümüş, 2 bürünc medalla çempionatı komanda hesabında ikinci yerdə başa vurub. 

Dünən çempionatın 3-cü günündə yunan-Roma güləşçilərimiz də mü­barizəyə uğurla start veriblər. Belə ki, xalça üzərinə çıxan güləşçilərimizin 5-i də mükafat qazanmağa nail olublar. Təmsilçilərimizdən Ziya Babaşov (63 kq), Ülvi Qənizadə (72 kq) və Murad Əhmədiyev (97 kq) qızıl medala layiq görülüblər. Fərid Sadıxlı (55 kq), Azad Əliyev (82 kq) isə bürünc medal alıblar. 

Bununla da, komandamızın əldə et­diyi medalların sayı, ümumilikdə 18-ə çatıb.

Qeyd edək ki, mindialda 18 ölkədən 200-dən çox güləşçi mübarizə aparır. Yarış dekabrın 3-dək davam edəcək.

Leyla QURBANOVA
XQ