Bu milli layihə beynəlxalq dəyər qazanır
Ağ təmizlik, məsumluq, təravətin rəmzidir. “Qızlara ağ yaraşır”, – deyəndə isə hamımızın ağlına nədənsə yalnız bəyaz gəlinlik gəlir. Bu, bəlkə də ona görədir ki, ağ rəngin daha bir gizli mənası “başlanğıc”dır. Adət-ənənəyə görə, qızlar üçün bəyaz gəlinlik xoşbəxt bir başlanğıcdır.
Azərbaycan Cüdo Federasiyasının “Azercell Telekom”la birgə “Qızlara ağ yaraşır” layihəsi çərçivəsində yayımlanan sosial çarxa baxanda isə gözümün önündə adət-ənənələrin təsiri altında yetkinlik yaşına çatmayan qızlara belə anaların həvəslə geyindirmək istədiyi ağ gəlinlik və bu məsumların sonrakı iztirabları və qırılan taleləri gəldi. Nəzərə alsaq ki, federasiyanın bu uğurlu layihəsi həm qlobal, həm də ölkə səviyyəsində aktual olan erkən nikah mövzusuna əsaslanıb, onun cəmiyyətimizə bu sahədə verdiyi töhfəni anlamış olarıq. Bu ilin iyun ayından həyata keçirilən layihə çərçivəsində hansı işlər görülüb?
Federasiyanın mətbuat xidmətinin rəhbəri Ülkər Abbasova “XQ”ya müsahibəsində layihə çərçivəsində artıq çox geniş işlərin görüldüyünü bildirdi. O, bunun həm də ictimaiyyət arasında layihəyə böyük maraq göstərilməsi ilə əlaqələndirdi:
– “Layihə başlayanda federasiyaya şəhər, rayon və kəndlərimizdən yüzlərcə zəng gəlirdi. Valideynlər böyük həvəslə qızlarını cüdoya yazdırmaq istəyirdilər. Düzü, özümüz də regionlarda, hətta ucqar kəndlərimizdə qızlarımızın bu qədər böyük həvəslə cüdoya yazılmaq istəyinin olduğunu bilmirdik. Ötən aylar ərzində cüdo ilə məşğul olmaq istəyən qızlarla genişmiqyaslı iş aparılıb. Federasiya cüdo məktəbləri və bölmələri olan bölgələrimizdə yeni kampaniyaya start verib. 7-14 yaşlı qızların cüdoya yazılması, qeydiyyatdan keçən ilk 1000 qız tələbəmizə isə cüdoqi dəstlərinin paylanılması və 1 ay pulsuz məşqlər nəzərdə tutulub. Federasiyanın əsas tələbi budur ki, cüdo ilə məşğul olan qızların sayını artıraq. Çünki bu idman növü ilə məşğul olanlar arasında kəskin fərq olurdu. İndi isə uşaqlar arasında bu fərq xeyli azalıb.
Ülkər Abbasova qızlarımızın erkən yaşda ərə verilməsinin, uşaq yaşda ana olmağın ağır fəsadlarının cəmiyyətimizdə mənfi hal olduğunu qeyd etdi:
– “Bu sosial layihə vasitəsilə qızlar arasında, həm də maarifləndirməni həyata keçiririk. Layihənin məqsədi, həmçinin qızlarımızın fiziki və mənəvi cəhətdən sağlam yetişməsi, gələcəyə əmin addımlarla irəliləməsinə nail olmaqdır.
Xatırladaq ki, gender problemi təkcə Azərbaycanda yox, bütün dünyada ciddi məsələlərdən biridir və ona qarşı sərt tədbirlər görülür. Dünyanın ən nüfuzlu idman yarışı olan Olimpiya Oyunlarında gender bərabərliyi qəti şəkildə qoyulub. Beynəlxalq Olimpiya Komitəsinin prezidenti Tomas Bax gender bərabərliyinin hər bir təşkilat üçün mühüm əhəmiyyətli məsələ olduğunu bildirib. O qeyd edib ki, yaşadığımız cəmiyyətin yarısını məhz qadınlar təşkil edir. Diqqət etsək, Olimpiya Oyunlarında, dünya, Avropa çempionatları və digər yarışlarda Azərbaycan “Qızlara ağ yaraşır” layihəsi artıq təkcə Azərbaycanda yox, beynəlxalq miqyasda da böyük marağa səbəb olub. Qısa müddət ərzində görülən işlər, bu istiqamətdə həyata keçirilən tədbirlər nəticəsində layihə bu günlər Mərkəzi Asiyanın ən böyük kommunikasiya festivalında – “Red Jolbors”da Qran-pri mükafatına layiq görülüb. Qran-pri ilə yanaşı, layihə, 3 qızıl, 1 gümüş və 2 bürünc mükafat da qazanıb.
Bundan əvvəl isə layihə beynəlxalq “Ad Black Sea” festivalının Qran-pri mükafatına, həmçinin 13 kateqoriya üzrə 6 mükafata layiq görülüb.
Leyla QURBANOVA
XQ