Bolqarıstanın Müqəddəs Kliment Oxridski adına Sofiya Universitetində “Azərbaycan Avropa və Asiyanın kəsişməsində” adlı beynəlxalq elmi konfrans keçirilib.
Ali məktəbdəki Azərbaycan Dili və Mədəniyyəti Mərkəzinin 10 illiyinə həsr olunan mərasimdə Azərbaycanın Bolqarıstandakı səfiri Hüseyn Hüseynov ölkələrimiz arasında mədəni əlaqələrinin inkişafında elm adamlarının xüsusi rolu olduğunu bildirib və onlara bu fəaliyyətlərində uğurlar arzulayıb.
Konfransda Bakı Dövlət Universitetinin jurnalistika fakültəsinin elmi işlər üzrə dekan müavini, dosent Sevinc Əliyeva xaricdə yaşayan soydaşlarımızın Azərbaycanın milli-mənəvi dəyərlərinin dünyada təbliğ edilməsi missiyasının daşıyıcıları, ana dilinin isə hər bir millətin maddi və mənəvi irsini qoruyan və inkişaf etdirən güclü vasitə olduğunu söyləyib.
Dövlət Dil Komissiyası yanında Monitorinq Mərkəzinin direktoru, professor Sevinc Əliyeva, Bakı Slavyan Universitetinin prorektoru Nailə Xəndan, xalqlar arasında dostluğun möhkəmlənməsində dillərin qarşılıqlı əlaqəsinin rolundan söz açıblar. Sofiya Universitetinin “Azərbaycan dili və mədəniyyəti mərkəzinin” direktoru Sofiya Şıqayeva–Mitreskaya, Türkologiya və altayşünaslıq kafedrasının müdiri, professor İrina Sarıvanova kafedranın dosenti Milena İyordanova və basqaları Azərbaycan dilinin zənginliyindən danışıb, bolqar dili ilə müqayisəli təhlillər aparıblar.
XQ