Dünən Bakıda UEFA Konfrans Liqasının II təsnifat mərhələsinin cavab oyununda “Neftçi” Sloveniyanın “Jelezniçar” komandasını qəbul edib.
Oyunun birinci hissəsində meydan sahibləri hesabda önə çıxıblar – 1:0. 20-ci dəqiqədə Sayef topu rəqib qapısından keçirib. 68-ci dəqiqədə isə Eddi İsrafilov baş zərbəsi ilə fərqi artırıb – 2:0.
UEFA Konfrans Liqasında mübarizə aparan “Sabah” klubu da növbəti mərhələyə yüksəlib. Bakı klubu öz meydanında Latviyanın “RFŞ” komandasını 2:1 hesabı ilə məğlubiyyətə uğradaraq üçüncü təsnifat mərhələsinə vəsiqə qazanıb.
Ölkəmizin UEFA Konfrans Liqasında digər təmsilçisi “Qəbələ” isə dünənki cavab görüşündə də “Omoniya”ya uduzub. Kipr təmsilçisi bu dəfə böyük hesabla qalib gəlib – 4:1. Beləliklə “Qəbələ” Konfrans Liqasında mübarizəni dayandırıb.
Leyla SABİRQIZI, “Xalq qəzeti”
