Sloveniyanın Maribor şəhərində Avropa Gənclər XVII Yay Olimpiya Festivalının açılış mərasimi keçirilib. 

İdmançıların paradında Azərbay­can millisinin önündə bayrağımızı Mə­dinə Babayeva və Ramazan Əhmədov daşıyıblar.

“Lyudski vrt” stadionunda keçirilən mərasimdə Sloveniya Prezidenti Na­taşa Pirts Musar, Avropa Olimpiya Ko­mitəsinin prezidenti Spiros Kapralos və digər Olimpiya komitələrinin rəhbər şəxsləri iştirak ediblər. 5 mindən artıq azarkeşin arenadan birbaşa izlədiyi açılışda oyunların məşəlini sloveniyalı atlet Marovt və ölkə Prezidenti Musar alovlandırıb. Olimpiya məşəli rəssam Qreta Qodniç tərəfindən hazırlanıb və oyunların proqramına daxil edilən 11 idman növünü özündə əks etdirir.

Sonra Avropa Olimpiya komitələ­rinin bayrağı qaldırılıb. Könüllülər, id­mançılar, hakimlər və məşqçilər adın­dan and içilib. 

Tədbirdə çıxış edən Avropa Olimpi­ya Komitəsinin prezidenti Spiros Kap­ralos bu multiidman tədbirinin idmanın gələcəyi üçün böyük əhəmiyyət kəsb etdiyini bildirib. Qeyd edib ki, məhz bu festivalda fərqlənən idmançılar sonra­dan böyük idman yarışlarında, xüsu­silə, Olimpiya Oyunlarında öz ölkələrini təmsil edirlər.

Sloveniya Prezidenti Nataşa Pirts Musar festivalı açıq elan edib: “Qoy bu Olimpiya Festivalı idmanın gerçək­ləşən arzularının, dostluğun və qarşı­lıqlı hörmətin bayramı olsun”.

Dünən artıq yarışa start verilib. Festivalın ilk günü komandamızın üzv­ləri atletika və üzgüçülük yarışlarında mübarizəyə qoşulublar. 

Qeyd edək ki, Azərbaycan koman­dası multiidman tədbirində 7 növ üzrə (şose velosipedi, dağ velosipedi, cüdo, tennis, gimnastika, atletika, üzgüçülük) təmsil olunur. Komandamızın heyətin­də cüdo (12), atletika (8), velosiped (6), tennis (4), gimnastika (3) və üzgüçülük (2) idman növləri üzrə 36 idmançı yer alıb.

Festivalda 48 ölkədən idmanın 11 növündə 3 min 600-ə yaxın 13-18 yaşlı idmançılar iştirak edirlər. Yarışın bağ­lanış mərasimi iyulun 29-na təsadüf edəcək.

L.SABİRQIZI, “Xalq qəzeti”