İspaniyanın Santyaqo de Kompostela şəhərində güləş üzrə U-20 Avropa çempionatında uğurla çıxış edən komandamızın 3 üzvü finala vəsiqə qazanıb.  U-23 Avropa çempionatının qalibi olan Elmir Əliyev (55 kq) həlledici mərhələdə ispaniyalı Xames Kastano (9:0), fransalı İliyan Aynau (7:0), türk Muhammet Emin Çakır (10:1) və ermənistanlı Homeros Arakelyan (8:0) üzərində böyük hesablı qələbə qazanıb. Güləşçimiz finalda ukraynalı Marko Voloşinlə güləşəcək.

Davud Məmmədov (77 kq) səkkizdəbir finalda ermənistanlı Vahe Hovannisyana şans tanımayıb - 7:1. Güləşçimiz növbəti mərhələdə ukraynalı Ruslan Abdiyevdən güclü olub - 4:2. D.Məmmədov yarımfinalda bolqarıstanlı Martin Dimitrovu da üstələyərək (7:1) adını Avropa çempionatının finalına yazdırıb. Pəhləvanımız həlledici görüşdə rumıniyalı Aleksandru Soloveylə qarşılaşacaq.

Mübarizəyə dörddəbir finaldan qoşulan Məzaim Mərdanov (130 kq) yunanıstanlı Axilles Xrisidisə sonuncu xal prinsipinə əsasən (1:1) qalib gələrək yarımfinala yüksəlib. Yarımfinalda estoniyalı Eerik Pankla görüş dramatik alınıb. 0:7 hesabı ilə geri düşən Şəmkir güləş məktəbinin yetirməsi əsl əzmkarlıq nümayiş etdirərək, yekunda 8:7 hesablı qələbə qazanıb. Güləşçimiz finalda macarıstanlı Laşlo Darabosla mübarizə aparacaq.

Komandamızın digər üzvü Fəraim Mustafayev (63 kq) isə təsəlliverici görüşdə iştirak edəcək. Bu mərhələdə onun rəqibi çexiyalı Matous Yankeviç olacaq.