Albaniyanın paytaxtı Tiranada güləş üzrə U-17 Avropa çempionatında Azərbaycan güləşçiləri uğurla çıxış ediblər. Sərbəst güləş üzrə millimizin 10 üzvündən 7-si fəxri kürsüyə qalxıb.
Dörd qızıl və üç bürünc medal əldə edən yığmamız medalların əyarına görə, bütün ölkələri qabaqlayaraq birinci yeri tutub. Müqayisə üçün qeyd edək ki, ən yaxın izləyicimiz olan Gürcüstan 2 qızıl, 1 gümüş və 4 bürünc medal qazanıb.
Millimiz xal sistemi üzrə sıralamada isə 155 xalla ikinci yerdə qərarlaşıb.
Xatırladaq ki, komandamızın heyətində Cəfər Cəfərov (45 kq), Hacı Kərimov (55 kq), Camal Abbasov (60 kq) və Yusif Dursunov (110 kq) Avropa çempionu olublar. Seyhun Əlizadə (51 kq), Mirzəağa Axundov (65 kq) və İsmayıl Rəhimli (71 kq) isə üçüncü yeri tutub.
Leyla SABİRQIZI, “Xalq qəzeti”
