Bakıda gözəl idman növü olan bədii gimnastika üzrə Avropa çempionatı uğurla davam edir. Hollivud ab-havasında dizayn olunmuş Milli Gimnastika Arenasının səhnəsində keçirilən yarışın üçüncü günündə də yarış iştirakçıları xalça üzərində parlaq çıxışları ilə göz qamaşdırıblar. Nümayiş etdirdikləri çıxışlar ətrafında fikirlərini bölüşən əcnəbi idmançılar, həm də yarışların yüksək təşkil olunduğunu vurğulayıb, ölkəmiz və paytaxt Bakı ilə bağlı xoş təəssüratlarını bölüşüblər.
Xorvatiyalı idmançı Tamara Artic Avropa çempionatında iştirakın onun yarış təcrübəsinin zənginləşməsinə töhfə verdiyini bildirir. Qeyd edir ki, Bakıda təşkil edilən yarışları çox sevir və bu fürsət əlinə düşdüyü üçün məmnundur.
Estoniya komandasının üzvü Ester Kreytsman Milli Gimnastika Arenasında gözəl şəraitin yaradıldığını, burada hər şeyin onun xoşuna gəldiyini deyir, hətta Bakıda qalmağa da hazır olduğunu vurğulayır. Böyüklər arasında Avropa çempionatında ilk dəfə mübarizə apardığını bildirən gimnast potensialından maksimum istifadə üçün böyük səy göstərdiyini bildirib.
Milli Gimnastika Arenasının indiyədək çıxış etdiyi ən möhtəşəm və rahat məkanlardan biri olduğunu deyən latviyalı Nikola Vasileva haqlı olaraq qeyd edir ki, məhz bütün bu amillər yüksək səviyyədə mübarizə aparmağa köməkdir. Paytaxtımızda bir çox beynəlxalq turnirə, dünya kuboku yarışlarına qatıldığını dilə gətirən gimnast, bu yarışın da həmişəki kimi yüksək səviyyədə keçdiyini etiraf edir.”
Nikola Vasileva Bakıdan hər zaman xoş təəssüratlarla ayrıldığını bildirir: “Valideynlərim Bakıya gələ bilmədikləri üçün çıxışımı onlayn izləyirlər. Bakının gözəlliyi barədə Latviyada dostlarıma həmişə danışıram. Çalışıram ki, hər dəfə burada olanda şəhərin görməli yerlərini gəzim. Bakıya həm qədim, həm müasir şəhər demək olar. Gözəl arxitekturaya malik binalar xüsusilə diqqətimi cəlb edir.
Monteneqrolu Yelizaveta Luqovskix azarkeşlərin möhtəşəm dəstəyinin onları ruhlandırdığını deyir. Bakıda keçirilən gimnastika yarışlarının həmişə baxımlı olduğunu qeyd edən idmançı budəfəki turnirin daha da rəngarəng və maraqlı keçdiyini vurğulayır: “Çıxışlarımızdan həmişə razı qalsaydıq, bu, çox maraqsız olardı. Məsələn, top və halqa ilə təsnifat yarışlarındakı çıxışımdan bir qədər narazı qaldığım üçün növbəti dəfə xalçaya daha iddialı çıxmalıyam ki, istədiyim nəticəni əldə edim”.
“Qoca qitə”nin parlaq gimnastika ulduzları yarışın üçüncü günündə də bir-birindən maraqlı çıxışlar nümayiş etdirdilər. Avropanın ən güclü komandalarının bir araya gəldiyi Milli Gimnastika Arenasında layiqlilərin seçilməsi üçün gərgin rəqabətlə yanaşı, idman və incəsənətin harmoniyasından doğan gözəllik və zərifliyin nümayişi gimnastikasevərlərin zövqünü oxşadı.
Yarışın üçüncü günündə böyüklər arasında çoxnövçülük üzrə təsnifat mərhələsi başa çatıb. İştirakçılar 24 idmançının mübarizə apardığı çoxnövçülük proqramı və ayrı-ayrı alətlər üzrə finallar uğrunda qüv-vələrini sınayıblar. Gimnastlar gürz və lentlə kompozisiyalar ifa ediblər.
Komandamızın üzvü Zöhrə Ağamirova gürzlərlə hərəkətlərin icrasında 31.500 xal toplayaraq üçüncü pillədə qərarlaşmaqla, həm də finala yüksəlib.
İdmançımız həmçinin dörd hərəkətin yekununda 95,750 xalla beşinci pillədə qərarlaşaraq çoxnövçülük üzrə həlledici mərhələyə vəsiqə əldə edib. Xatırladaq ki, idmançımız halqa və topla da finala yüksəlmişdi.
Gimnastımız bu gün çoxnövçülük üzrə finallarda, mayın 21-də isə ayrı-ayrı alətlər üzrə final mərhələsində mübarizəyə qoşulacaqlar.
Bu gün, həmçinin böyüklərdən ibarət qrup komandalarının təsnifat mərhələsində çıxışlarına start veriləcək.
Xatırladaq ki, Azərbaycanın Gövhər İbrahimova, Səkinəxanım İsmayılzadə, Mədinə Aslanova, İlahə Bahadırova, Ayan Sadıqova və Zəhra Cəfərovadan ibarət gənclər komandası isə qrup hərəkətlərində çoxnövçülük və beş topla proqramda iki bürünc medal qazanıb.
Leyla QURBANOVA, “Xalq qəzeti”