Bu gün Bakıda Milli Gimnastika Arenasında bədii gimnastika üzrə Avropa çempionatı start götürür. “Ulduz kimi parla” şüarı ilə keçiriləcək qitə çempionatında 38 ölkədən 315 gimnast (böyüklər – 191, gənclər 124) iştirak edəcək.
Fərdi gimnastlar ayrı-ayrı alətlər (top, halqa, gürzlər lent), komanda hesabı və çoxnövçülük proqramında çıxış edəcəklər. Qrup hərəkətləri üzrə komandalar böyüklər arasında beş halqa, üç lent və iki top, gənclər arasında isə beş ip və beş top proqramında güclərini sınayacaqlar.
Ölkəmiz yarışda böyüklər arasında fərdi növdə Zöhrə Ağamirova və İlona Zeynalova ilə təmsil olunacaq.
Güllü Ağalarzadə, Ləman Əlimuradova, Kamilla Əliyeva, Zeynəb Hümmətova, Yelizaveta Luzan və Darya Sorokina isə qrup hərəkətləri proqramında böyüklər arasında xalça üzərinə çıxacaqlar. Gənclərin yarışında isə Gövhər İbrahimova, Səkinəxanım İsmayılzadə, Mədinə Aslanova, İlahə Bahadırova, Ayan Sadıqova və Zəhra Cəfərovadan ibarət qrup komandamız mübarizə aparacaq.
Avropa çempionatı mayın 21-dək davam edəcək.
