Teplitsedə 3 qızıl, 1 gümüş 3 bürünc

Azərbaycan cüdoçuları Çexiyanın Teplitsedə keçirilən Avropa Kuboku turnirinin ilk günündə 7 medal qazanıblar. Azərbaycan Cüdo Federaaiyasının mətbuat xidmətindən aldığımız məlumata görə, idmamçılarımız 3 qızıl, 1 gümüş və 3 bürünc medal əldə ediblər.

Ümumilikdə, turnirin ilk günü 8 çəki dərəcəsində 18 cüdoçumuz tatamiyə çıxıb. Qızlar arasında -48 kq. çəkidə Vüsalə Hacıyeva və -52 kq. çəkidə Xədicə Qədəşova bürünc medal qazanıb. -52 kq. çəkidə yarışan cüdoçumuz Aytən Verdiyeva yarışı 7-ci yerdə başa vurub.

Oğlanlar arasında -55 kq. çəkidə final görüşündə iki cüdoçumuz Ayxan Mirzəzadə və Fərid Qarayev qarşılaşıb. Nəticədə Fərid Qarayev qızıl medal əldə edib. Eyni çəki dərəcəsində yarışan digər cüdoçumuz Mirxaliq İskəndərov bürünc medala sahib olub. -60 kq. çəkidə Məhəmməd Musayev və -66 kq. çəkidə Əbil Yusubov bütün rəqiblərinə qalib gələrək fəxri kürsünün ən yüksək pilləsinə qalxıb.

Elçin AĞAMİRZƏ,
"Xalq qəzeti"