Paytaxt Bakı daha bir mötəbər yarışa ev sahibliyi edəcək. Belə ki, Gənclər və İdman Nazirliyi və Azərbaycan Şahmat Federasiyasının birgə təşkilatçılığı əsasında “Baku Open 2023” Beynəlxalq Şahmat Festivalı keçiriləcək.
Federasiyanın məlumatına görə, ümummilli lider Heydər Əliyevin anadan olmasının 100 illik yubileyinə həsr olunan mötəbər turnir “Baku Crystal Hall”da olacaq.
Festivalda şahmatçılar üç qrupda (A, B və C) mübarizə aparacaqlar. Hər üç qrupda yarış İsveçrə sistemi üzrə 9 turdan ibarət olacaq.
Qeyd edək ki, turnirin ümumi mükafat fondu 55 min ABŞ dolları təşkil edir. Yarışın “A” qrupunun qalibi olan şahmatçı 12 min ABŞ dolları və xüsusi hazırlanan kuboku qazanacaq. Festivalın “C” turnirində hər yaş qrupunda (U08, U10, U12) qalib olan Azərbaycanı təmsil edən şahmatçılar Rumıniyada keçiriləcək yeniyetmələrin Avropa çempionatında iştirak hüququ qazanacaq.
Yarışda ilk tur mayın 4-də saat 14-30-da başlayacaq. Festivala mayın 12-də yekun vurulacaq.
Elçin AĞAMİRZƏ, “Xalq qəzeti”
