Özbəkistanın Daşkənd şəhərində Rüstəm Kasımjanov kuboku uğrunda dünyanın tanınmış şahmatçılarının iştirakı ilə keçirilən yarışda iştirak edən Azərbaycan nümayəndə heyəti Vətənə qayıdıb.
Yarışda turnirin baş hakimi olmuş Azərbaycan Şahmat Federasiyasının birinci vitse-prezidenti Faiq Həsənov yarışla bağlı fikirlərini eksklüziv olaraq “Xalq qəzeti” ilə bölüşdü.
F.Həsənov Azərbaycan qrossmeysteri Şəhriyar Məmmədyarov, eləcə də blits üzrə dünya çempionu Nodirbek Abdusattarov və digər tanınmış şahmatçıların qatıldıqları bu yarışın ilk dəfə təşkil edildiyini bildirdi. Qeyd etdi ki, oyunlar gərgin mübarizə şəraitində keçdi: “Yarış yüksək səviyyədə keçirildi. Rüstəm Qasımjanov Özbəkistanın görkəmli zəka ustalarından biridir. O, 2004-cü ildə keçirilən dünya çempionatında qalib olanda Teymur Rəcəbov da bürünc medal qazanmışdı. Şəhriyar Məmmədyarovun da mübarizə apardığı həmin yarışda hakimlərdən biri də mən idim.
Rüstəm Qasımjanov hazırda Özbəkistanda yeni şahmatçı nəsli yetişməsində çox böyük rol oynayır. Keçən il Hindistanda keçirilən olimpiadada gözlənilmədən gənc Özbəkistan yığması qalib oldu. Şahmatçılar arasında böyük hörməti var. Azərbaycanda tez-tez olur. Keçən il Şuşada keçirilən ilk beynəlxalq turnirdə iştirak etmişdi. Bu il Bakıda keçiriləcək dünya kubokuna Özbəkistan yığmasının heyətində məşqçi kimi qatılacaq”.
Federasiya rəsmisi Daşkənddə ümummilli lider Heydər Əliyevin xatirəsini andıqlarını da bildirdi: “Azərbaycanda idmanın, o cümlədən şahmatın inkişafında ulu öndər Heydər Əliyevin xidmətləri əvəzsizdir. Daşkənddə olarkən Azərbaycanın Özbəkistandakı səfirliyinin nümayəndəsi ilə birgə ümummilli liderimizin şəhərin mərkəzindəki büstünü ziyarət etdik, önünə tər gül dəstələri düzdük. Müstəqil dövlətimizin qurucusu Heydər Əliyev hər bir kəsin qəlbində əbədi yaşayacaq.
Böyük öndərimiz daim hörmət və məhəbbətlə anılacaq”.
L.QURBANOVA, “Xalq qəzeti”