Azərbaycan Cüdo Federasiyaının mətbuat xidmətindən aldığımız məlumata görə, Xorvatiyanın paytaxtı Zaqreb şəhərində keçirilən yeniyetmələr arasında Avropa Kuboku turnirində cüdoçularımız 3 qızıl, 1 gümüş və 4 bürünc medal qazanıb.
Qeyd olunur ki, Azərbaycan yarışda 50 nəfərdən ibarət heyətlə təmsil olunub. Turnirin ilk günündə Azərbaycan cüdoçuları 1 qızıl və 4 bürünc medal əldə edib. İkinci gündə isə oğlanların yarışında -73 kiloqram çəki dərəcəsində Süleyman Şükürov finalda polşalı idmançı Şimon Brzuszczynskini məğlub edərək qızıl medal qazanıb. -81 kiloqram çəkidə Aslan Kotsoyev final görüşündə Lüksemburq təmsilçisi Miça Velterə qalib gələrək komandamızın aktivinə üçüncü qızıl medalı yazdırıb. +90 kiloqramda Ramazan Əhmədov turnirin gümüş medalçısı olub. -81 kiloqram çəkidə mübarizə aparan cüdoçu Hüseyn Eyvazlı yarışı 5-ci yerdə tamamlayıb.
Azərbaycan yığması yarışda medal əyarına görə ümumi hesabda və oğlanlar arasında birinci yeri tutub.
Elçin AĞAMİRZƏ, “Xalq qəzeti”
