Dünən Bakıda BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasına (COP29) hazırlıq çərçivəsində tikinti sahəsində fəaliyyət göstərən yerli və xarici tikinti şirkətlərinin rəhbərlərinin iştirakı ilə Azərbaycanda “yaşıl” tikinti üzrə “dəyirmi masa” keçirilib. Tədbirin məqsədi yerli tikinti şirkətlərini, inşaat materiallarının istehsalı ilə məşğul olan müəssisələri, xarici şirkətləri və ekspertləri, eyni zamanda, dövlət orqanlarının nümayəndələrini bir araya gətirməklə davamlı və sıfır karbonlu tikintiyə keçid üçün müzakirələrin aparılması və əməkdaşlıq platformasının yaradılmasıdır.

“Dəyirmi masa”da çıxış edən eko­logiya və təbii sərvətlər naziri, COP29-un prezidenti Muxtar Babayev bildirib ki, hazırda CO2 (karbon-dioksid) qazı­nın 21 faizi tikinti sektorunda formalaşır. Qeyd olunub ki, tikinti fəaliyyəti havanın çirklənməsinə gətirib çıxarır ki, bu da öz növbəsində insan sağlamlığı üçün neqativ nəticələr yaradır. “Biz bunu necə azalda bilərik? Hansı yeniliklər qəbul edə bilə­rik? Bunlar barədə düşünməliyik. Hər hansı bir bəyanat imzalamaqla yox, icra etməklə nəticə əldə etməliyik. Nəzarət sistemindən çıxmalıyıq. Hər bir şirkət özü məsuliyyət daşımalı, addım atmalıdır”, – deyə M. Babayev əlavə edib. 

Dövlət Şəhərsalma və Arxitektura Komitəsinin sədri Anar Quliyev çıxışında qlobal istiləşmənin yaratdığı iqlim böhra­nında dayanıqlı tikintinin daha çox önəm daşıdığını bildirib. Azərbaycanın COP29-a sədrlik etməklə qlobal iqlim dəyişikliyi ilə mübarizədə qətiyyətli olduğunu sübut et­diyini vurğulayan komitə sədri rəhbərlik etdiyi qurumun tikinti sənayesində rəqəm­sallaşdırma və ətraf mühitin qorunması ilə bağlı bir sıra tədbirlərin həyata keçirdiyini diqqətə çatdırıb. Onun sözlərinə görə, qısa müddət ərzində damüstü günəş enerjisi sisteminin quraşdırılması təsdiq edilib, ha­zırda isə işğaldan azad olunmuş ərazilərdə “yaşıl enerji” zonası yaradılması ilə bağlı tədbirlər həyata keçirilir. A. Quliyev, həm­çinin ölkəmizdə damüstü günəş enerjisi sisteminin quraşdırılmasının təsdiq edildi­yini iştirakçıların diqqətinə çatdırıb.

Qeyd edək ki, Azərbaycanın dayanıq­lı “yaşıl” tikinti rəhbərlərinin “dəyirmi masa” müzakirəsi baş icraçı direktor­lar, nazirlər, BƏƏ-nin tikinti şirkətləri, COP29-un prezidenti və BMT-nin COP29 üzrə yüksək səviyyəli çempionu daxil ol­maqla ölkəmizin aparıcı sənaye liderlə­rinin xüsusi yüksək səviyyəli görüşüdür. “Dəyirmi masa” qlobal iqlim hədəflərinə nail olmaq istiqamətində “yaşıl” tikintinin mühüm rolunu vurğulayır və COP29-a ge­dən yolda əhəmiyyətli mərhələyə işarə et­məklə Azərbaycan və onun hüdudlarından kənarda ciddi nəticələri olan məqsədyönlü biznes əməliyyatları və əməkdaşlıq üçün zəmin yaradır. Ekspertlərin fikrincə, bu unikal tədbir çağırışları müzakirə etmək, imkanları araşdırmaq və əlverişli siyasət­ləri müəyyən etmək məqsədilə platforma təqdim etməklə Azərbaycanın tikinti sek­torunda əməkdaşlıq və dayanıqlı inkişafa təkan verəcək.

Tədbirin sonunda COP29 Təşkilat Ko­mitəsinin bir neçə üzvü və Azərbaycanda fəaliyyət göstərən bəzi tikinti şirkətinin rəhbərləri tərəfindən “Azərbaycanın Da­yanıqlı Yaşıl Tikinti Bəyənnaməsi” im­zalanıb. Bəyannamənin məqsədi tikinti şirkətlərinin emissiyaların azaldılması mə­suliyyətini dərk etdiyini göstərməsidir. Bə­yannamə bu istiqamətdə atılan addımın ilk mərhələsidir. Daha sonra isə məsuliyyəti dərk etmək mərhələsindən əməli fəaliyyətə keçid olacaq.