Bu ilin birinci yarısında Azərbay­canda 13 milyon 557,4 kilovat-saat elektrik enerjisi istehsal olunub. Bu barədə Dövlət Statistika Komitəsindən məlumat verilib. Bildirilib ki, hesabat dövründə külək elektrik stansiyala­rında 29,7 milyon kilovat-saat, günəş elektrik stansiyalarında isə 286,6 mil­yon kilovat-saat elektrik enerjisi isteh­sal edilib. 

Beləliklə, “yaşıl enerji” mənbələri üzrə elektrik istehsalı ötən ilin müvafiq döv­rünə (1 milyon 81,7 kilovat-saat) nisbətən iki dəfəyə yaxın artaraq 2 milyon 32,4 milyon kilovat-saata çatıb. Günəş enerjisi istehsalını isə ölkəmiz üçün rekord göstə­rici hesab etmək olar. Belə ki, yanvar–iyun aylarında günəş enerjisi istehsalının həcmi əvvəlki 32,3 milyon kilovat-saat göstəricini 9 dəfə üstələyib. 

Məsələyə münasibət bildirən Milli Məclisin İqtisadi siyasət, sənaye və sa­hibkarlıq komitəsinin üzvü Vüqar Bayra­mov sosial şəbəkə hesabında qeyd edib ki, COP29-a evsahibliyi edəcək Azər­baycanda bərpaolunan mənbələrdən enerji istehsalının artırılması regionda “yaşıl enerji” zonasının genişlənməsinə dəstəkdir. Bunu ölkəmizin iqlim dəyişik­liyi və ətraf mühitin qorunması, eləcə də yaşıl iqtisadiyyatın güclənməsi ilə bağ­lı qlobal və regional hədəflərə töhfəsi kimi dəyərləndirən deputat bildirib ki, inkişaf etmiş ölkələrdə icmalar, eləcə də ailələr bərpaolunan enerji mənbələr­dən, o cümlədən külək və günəş şüa­larından enerji istehsal edərək həm öz istehlaklarını ödəyirlər, həm də artıq hissəni dövlətə satırlar”. “Oxşar prak­tikanın Azərbaycanda tətbiq olunması elektrik enerjisi istehsalını artırmaqla yanaşı, vətəndaşların daha ucuz enerji almasına gətirib çıxara bilər. Bu, enerji istehsalı və satışına yeni yanaşmanın tətbiqinə imkan yaratmaqla yanaşı, enerji xəclərini azalda bilər. Bunun üçün icma əsaslı inteqrasiya olunmuş infrast­rukturun formalaşdırılması da vacibdir, – deyə V. Bayramov paylaşımında qeyd edib. 

XQ