Ölkəmizin işğaldan azad edilmiş ərazilərində indiyədək 300-dən çox fərdi yaşayış evində, ictimai və sosial binalarda ümumi gücü 2 min kilovatdan çox olan günəş panelləri quraşdırılıb və proses məskunlaşma planlarına uyğun davam etdiriləcək. Bunu Energetika Nazirliyi yanında Bərpa Olunan Enerji Mənbələri Dövlət Agentliyinin layihələrin idarə edilməsi şöbəsinin müdiri Cəbrayıl Əliyev bildirib. 

Agentlik nümayəndəsinin sözlərinə görə, artıq Laçın rayonunun Zabux kən­dində 223, Sus kəndində 59 fərdi yaşayış evinin hər birində 3,3 kilovat, Laçın şəhə­rində 24 fərdi yaşayış evinin hər birində 3-5 kilovat, Zəngilan rayonunda yerləşən Konqres Mərkəzində 166 kilovat, Füzuli, Laçın, Zabux və Susdayerləşən məktəb binalarında 20-40 kilovat, Zəngilan rayo­nunun Ağalı kəndində inzibati binaların üzərində ümumi gücü 325 kilovat olan damüstü günəş panelləri quraşdırılıb və şəbəkəyə qoşulma təmin edilib.

Azərbaycan Respublikasının Prezidenti İlham Əliyevin bilavasitə təşəb­büsü və qərarı ilə işğaldan azad edilmiş ərazilər “yaşıl enerji” zonası elan edilib və hazırda bu ərazilərdə “Yaşıl Enerji Zo­nası” Konsepsiyası tətbiq edilməkdədir. C.Əliyev deyib ki, işğaldan azad edilmiş ərazilərdə mövcud olan yüksək bərpa­olunan enerji potensialının istifadəsi və ərazilərin ekoloji cəhətdən təmiz “yaşıl enerji” ilə təmin edilməsi Konsepsiyanın əsas məqsədlərindən biridir. Konsepsi­yanın tələblərinə əsasən, məskunlaşma zamanı fərdi evlərdə və ictimai binalarda yaşıl texnologiyaların, o cümlədən, günəş panellərinin quraşdırılması təmin edilmə­lidir.

“Yaşıl enerji zonası”nın yaradılma­sı çərçivəsində işğaldan azad edilmiş ərazilərdə bərpaolunan enerji mənbələ­rindən elektrik enerjisi istehsalı, enerji səmərəliliyi tədbirləri, elektrik nəqliyyat vasitələrindən istifadə, tikililərin damla­rında bərpa olunan enerji qurğularının (xüsusən günəş panellərinin) qurulması, həmçinin, küçələrin və yolların işıqlan­dırılmasında günəş enerjisi əsaslı LED lampalardan istifadə, ağıllı enerji idarəet­mə texnologiyalarının tətbiqi kimi “yaşıl” texnologiyalardan istifadə şəhər, rayon, qəsəbə və kəndlərin layihələndirilməsi zamanı nəzərə alınan əsas amillərdən biridir”, – deyə o, əlavə edib. 

XQ