Davamlı yağıntılar bölgələrdə fəsadlar yaradıb

Ölkə ərazisində son günlər atmosfer təzyiqinin kəskin dəyişməsi səbəbindən uzun sürən yağışlar baş verir. Nəticədə, bir çox bölgələrdə sel və daşqınlar yaranaraq, əhaliyə və iqtisadiyyata ziyan vurur. 

Milli Hidrometeorologiya Xidmətinin rəisi Nazim Mahmudov qeyd edib ki, son günlər ölkə ərazisində düşən yağıntının miqdarı əksər bölgələrdə normadan xeyli çox olub. Xidmət rəisi, həmçinin bildirib ki, iyun ayı yüksək temperatur rejimi ilə fərqlənib. Belə ki, ay ərzində havanın temperaturu 28 gün normadan yüksək olub. Lakin ayın sonuna doğru soyuq at­mosfer cəbhəsinin təsiri nəticəsində ötən günlərlə müqayisədə temperatur bir qə­dər enib və 2 gün normadan aşağı olub. 

İyul ayının ilk günlərində də bölgələr­də yağıntılar olub. İyulun 2-də bəzi dağ­lıq və dağətəyi rayonlarda şimşək çaxıb, leysan xarakterli yağış yağıb. Düşən yağıntının miqdarı Gədəbəydə 33 mm, Daşkəsəndə 13 mm, Ordubad, Göygöldə 9 mm, Sədərəkdə 7 mm, Gəncə, Şərur­da 6 mm, Tovuz, Şəmkir, Qax, Balakən, Zaqatala, İsmayıllı, Göyçay, Goranboy, Şəki, Xaltan, Kürdəmir, Lerik, Ceyrançöl, Naftalan, Şahbuz, Naxçıvan, Beyləqan, Mingəçevir, Yevlaxda 3 mm olub.

Dünən Fövqəladə Hallar Nazirliyi­nin “112” qaynar telefon xəttinə inten­siv yağışlar səbəbindən Qəbələ rayonu Nohurqışlaq kəndi ərazisindəki Nohur gölündə suyun səviyyəsinin artması və ətraf ərazilər üçün təhlükəli vəziyyətin yaranması barədə məlumat daxil olub. Bununla əlaqədar əraziyə FHN-in Şi­mal-qərb Regional Mərkəzinin qüvvələri cəlb olunub. Hazırda mərkəzin qüvvələ­ri tərəfindən gölün daşmasının qarşısını almaq məqsədi ilə suyun səviyyəsinin endirilməsi və digər müvafiq təhlükəsizlik tədbirləri həyata keçirilir. 

İyulun 1-də intensiv yağışlar səbə­bindən Pirsaat çayının Hacıqabul rayo­nunun Qubalıbaloğlan kəndindən keçən hissəsinə sel gəlməsi nəticəsində bəzi fərdi yaşayış evlərinin həyətyanı sahələri və zirzəmiləri subasmaya məruz qalıb. Fövqəladə Hallar Nazirliyinin qüvvələri zəruri və təxirəsalınmaz tədbirlərin həya­ta keçirilməsi məqsədilə həmin əraziyə cəlb edilib.

Hazırda FHN-in Muğan Regional Mərkəzinin və Mülki Müdafiə Qoşunları­nın qüvvələri tərəfindən su basmış yer­lərdən suyun çəkilərək kənarlaşdırılması və digər müvafiq təhlükəsizlik tədbirləri­nin həyata keçirilməsi istiqamətində işlər intensiv şəkildə davam etdirilir. 

Fəsadlar Cənub bölgəsindən də yan ötməyib. İyunun 3-cü ongünlüyün­də dağlıq və dağətəyi ərazilərdə leysan xarakterli, intensiv və güclü yağışlar ya­ğıb, şimşək çaxıb. Astarada Pensərçay məcrasını dəyişib, çay kənarı evlər üçün təhlükə yaranıb. Astara rayonun Siyə­kü kəndi ərazisində Pensərçay çayı 40 metrəyə qədər məcrasını dəyişib, sahil­boyu ərazidə yerləşən 30 nəfər kənd sa­kinin həyətyanı torpaq sahəsinin 5-7 metr enində olan hissəsini yuyaraq aparıb, arı ailələri, ev quşları, sitrus və meyvə ağac­larına ziyan vurub. 

Liəzi kəndində uzunluğu 8 metr, eni 4 metr, Siyakeş kəndində uzunluğu 12 metr, eni 4 metr və uzunluğu 8 metr, eni 4 metr, Şağlazüzə uzunluğu 8 metr, eni 4 metr olan, ümumilikdə, 4 ədəd dəmir konstruksiyadan olan avtomobil kör­pülərini yarasız hala salmış, Viləşə, Bili, Çüvaş və Miki kəndlərində çınqıl örtük­lu avtomobil yollarına ziyan dəyib. Kijə­bə-Maşxan kəndlərarası avtomobil yo­lunda torpaq sürüşməsi nəticəsində yol bağlanıb. 

Sakinlər deyirlər ki, həmin gecə Pensərçayda suyun səviyyəsi 5 metrə kimi qalxıb və su həyətlərə dolub, çay kənarı evləri basıb. Sel suları vətəndaş­ların həyətində sitrus, meyvə ağaclarını da aparıb. Təbii fəlakət Lənkəran–Asta­ra Regional Təhsil İdarəsinin tabeliyində fəaliyyət göstərən 7 tədris ocağına ziyan vurub.

Lerikdə də güclü qasırğa və dolu cid­di fəsadlar törədib. Lənkəran–Lerik avto­mobil yolu uçqun səbəbindən bağlanıb, yolun 30, 32, 34, 35 və 37 kilometrliyində sel sularının gətirdiyi qum, çınqıl, ağac və qaya parçaları və torpaq kütləsi yolu bağlayıb. 52 saylı Yol İstismarı Məhdud Məsuliyyətli Cəmiyyətinin ağır texnikaları və canlı qüvvəsi yolun açılmasına cəlb edilərək yolda hərəkət qismən bərpa olu­nub. 

Bir neçə gün ərzində rayon icra ha­kimiyyəti, ərazi icra nümayəndələri, bələ­diyyə qurumları və yol istismar sahəsinin köməkliyi ilə Lənkəran–Lerik və əra­zilərə gedən bütün avtomobil yollarına gediş-gəliş tam təmin edilib, yollar daş, qum, çınqıl, palçıqdan təmizlənib.

Dolu və qasırğa infrastruktura, təsər­rüfatlara ciddi ziyan vurub. Şəhərin müxtəlif yerlərində 598 kvadratmetr isti­nad divarları uçub, 370 kvadratmetr as­falt örtüyü dağılıb, dam örtüklərinə zərər dəyib. Taxılçılıq, tərəvəzçilik sahələri yararsız hala düşüb. Torpaq sürüşməsi isə Lerik-Lənkəran magistralının 37-ci kilometrində – Lerik rayonunun Peştə­tük kəndi ərazisində baş verib. Rayon Fövqəladə Hallar Komissiyasının sədri Habil Məlikovun sözlərinə əsasən, hazır­da bərpa işləri davam edir. 

Vətəndaşların yaşayış evlərinə, fərdi təsərrüfatlarına, əkin sahələrinə, o cüm­lədən sosial obyektlərə dəymiş ziyanın dəqiq müəyyən edilməsi və aradan tam qaldırılması üçün komissiyası tərəfindən iş davam etdirilir.

Sinoptiklər bildirirlər ki, rayonlarda müşahidə olunan qeyri-sabit hava şəra­iti iyulun 3-ü axşamadək davam edəcək. Həmin gün Azərbaycanın əsasən dağlıq və dağətəyi rayonlarında arabir yağış yağacağı, şimşək çaxacağı gözlənilir. Ay­rı-ayrı yerlərdə leysan xarakterli intensiv olacağı, dolu düşəcəyi proqnozlaşdırılır. Axşama doğru yağıntı tədricən kəsiləcək. Mülayim şərq küləyi əsəcək. Havanın temperaturunun gecə 20-24°, gündüz 29-34° isti, dağlarda gecə 8-13°, gündüz 13-18° isti olacağı bildirilir.

Əli NƏCƏFXANLI,
Pünhan ƏFƏNDİYEV,
Məsaim ABDULLAYEV
XQ